یوسف كیلابی گواستنەوەی مووچە بۆ سەر بەغداد بە 'مژدانە' بۆ فەرمانبەرانی هەرێم ناودەبات
پەرەگراف
هەوڵەكان بۆ گواستنەوەی مووچەی فەرمانبەرانی هەرێم بۆ بەغدا بەردەوامن و یوسف كیلابی پەرلەمانتاری عێراق وەک "مژدە" بە مووچەخۆرانی ھەرێم دەڵێت كە سوودانی ئامادەیە ڕاستەخۆ مووچە بەسەر فەرمانبەرانی هەرێمدا دابەش بكات، ئەگەر لە یاسای بودجەدا بە بڕگەیەك جێگیر بكرێت.
ئەو ئەندامەی لیژنەی دارایی پەرلەمانی عێراق، لە تۆمارێكی ڤیدیۆییدا ڕایگەیاند، لەبارەی مووچەی فەرمانبەرانی هەرێمەوە سەردانی محەمەد شیاع سوودانی سەرۆكوەزیرانی عێراقی كردووە. سەرۆكوەزیران پێی راگەیاندووە، ئەگەر لە پەرلەمان دەنگ لەسەر دابەشكردنی مووچەی فەرمانبەرانی هەرێم ڕاستەوخۆ لە بەغداوە بدات و وەكوو بڕگەیەك لە هەمواری یاسای بودجەی 2024دا جێگیری بكەن، ئەوا "حكومەتیش یاساكە جێبەجێ دەكات" و مووچە دەنێرێت.
كیلابی كە بووە بە دیارترین دەموچاوی بەرگریكار لە گواستنەوەی مووچەی فەرمانبەرانی هەرێم بۆ سەر حكومەتی فیدراڵ، "مژدە" دەداتە فەرمانبەرانی هەرێمی كوردستان بەوەی كە "لە كۆی 25 ئەندامی لیژنەی دارایی، 20 ئەندامیان واژوویان بۆ هەمواركردنی یاسای بودجە كردووە، لە كاتێكدا داواكارییەكە تەنیا 10 وژووی پێویستە".
ئەو ئەندامەی لیژنەی دارایی رایدەگەیەنێت "هەفتەی داهاتوو دەست دەكرێت بە ڕێكاری هەمواری یاسای بودجەی 2024". دەشڵێت "لەگەڵ حیزبە كوردییەكان" قسەی كردووە و هەوڵ دەدەن ئەوە لە یاساكەدا بچەسپێنن كە ڕێگە بە وەزارەتی دارایی عێراق بدات ڕاستەوخۆ مووچەی فەرمانبەرانی هەرێمی كوردستان دابەش بكات.
بە قسەی كیلابی، تا ئێستا "زیاتر لە 250 فەرمانبەر"ی هەرێم واژوویان بۆ گواستنەوەی مووچەكانیان بۆ سەر حكومەتی فیدراڵ كردووە و ئەوانیش لە لیژنەی دارایی پاڵپشتی لە داواكارییەكانیان دەكەن.
پێشتر لە پەرلەمانی عێراق واژوو بۆ ڕاستەوخۆ دابەشكردنی مووچە لە بەغداوە كۆكرایەوە و یوسف كیلابی ڕایگەیاند "زیاتر لە 100 پەرلەمانتار واژوویان كردووە".
ئەندامانی فراكسیۆنەكانی یەكێتی، نەوەی نوێ، یەكگرتوو و كۆمەڵ واژوویان لەسەر داواكارییەكە كردووە، تەنیا فراكسیۆنی پارتی ڕەتی كردووەتەوە.
حكومەتی هەرێم ئەو داواكارییە بە "نادەستوور"ی ناو دەبات و دەڵێت "بە هیچ شێوەیەك جێبەجێ ناكرێت". مەسروور بارزانییش داوای لە پەرلەمانتاران كرد دەست لەو هەوڵە هەڵبگرن و وتی "ئەگەر مووچەش لە بابەتەكانی دیكە جیا بكرێتەوە، دیسان هەر دەبێت لە ڕێگەی دامودەزگا پەیوەندیدارەكانی حكومەتی هەرێمی كوردستانەوە دابەش بكرێت، نەك وەكوو ئەوەی هەندێك كەس داوایان كردووە كە بە میكانیزمێكی نادەستووری، ڕاستەوخۆ مووچەخۆران بە بەغداوە ببەسترێنەوە".
* مامۆستایان و فەرمانبەرانی ناڕازی: 200 هەزار واژوومان پێویستە بۆ گواستنەوەی مووچە بۆ بەغداد
* دەیان پەرلەمانتار واژوویان كردووە بۆ دابەشكردنی ڕاستەوخۆی مووچەی فەرمانبەرانی هەرێم لە بەغداوە
* دابەشكردنی مووچە ڕاستەوخۆ لەلایەن بەغداوە لەبەردەم 'یارییەكی پارتی و دوو لەمپەری گەورە' دایە