دەیان پەرلەمانتار واژوویان كردووە بۆ دابەشكردنی ڕاستەوخۆی مووچەی فەرمانبەرانی هەرێم لە بەغداوە
پەرەگراف
پەرلەمانتارانی فراكسیۆنە كوردییەكان لە پەرلەمانی عێراق جگە لە پارتی، لەگەڵ ژمارەیەك پەرلەمانتاری دیكە نزیكەی 60 واژوویان كۆكردووەتەوە و داوا دەكەن "مووچەی فەرمانبەرانی هەرێم ڕاستەخۆ (لەلایەن حكومەتی عێراقەوە) دابەش بكرێت".
یاداشتەكە ئەمڕۆ لە پەرلەمانی عێراق واژووی بۆ كۆكراوەتەوە و ئاراستەی محەمەد حەلبووسی، سەرۆكی پەرلەمانی عێراق كراوە. پەرلەمانتارانی هەریەك لە فراكسیۆنەكانی یەكێتی، نەوەی نوێ، یەكگرتوو و كۆمەڵ لەگەڵ ژمارەیەك پەرلەمانتاری عەرەب لەوانە: یوسف كیلابی، ئەندامی لیژنەی دارایی و حەسەن موئنیس، سەرۆكی فراكسیۆنی حقوق، واژوویان لەسەر كردووە.
لە یاداشتەكەدا داوا كراوە "هاوشێوەی فەرمانبەرانی فیدراڵی، مامەڵە لەگەڵ مووچەی فەرمانبەرانی هەرێمی كوردستان بكرێت. ڕاستەوخۆ مووچەی فەرمانبەرانی هەرێمی كوردستان خەرج بكرێت، بەپێی میكانزمێكی گونجاوی یاسایی و خێرا كە بتوانرێت جێبەجێ بكرێت".
پێشنیار كراوە كارتی ئەلیكترۆنی بە فەرمانبەرانی هەرێم بدرێت و ڕاستەوخۆ لە ڕێگەی بانكەكانی عێراق كە نووسینگەیان لە هەرێمی كوردستان هەیە، مووچەكانیان بخرێتە سەر هەژمارەكانیان.
ئەندامانی فراكسیۆنی پارتی لە پەرلەمانی عێراق واژوویان لەسەر یاداشتەكە نەكردووە.
پەرلەمانتارەكان هۆكاری ئەو داواكارییەیان بۆ دۆخی خراپی فەرمانبەرانی هەرێم لە چەند ساڵی ڕابردوودا گەڕاندووەتەوە، كە مووچەكانیان تووشی لێبڕین و پاشەكەوت و دواكەوتن بووەتەوە، لە ئەنجامی كێشە و ململانێكانی نێوان هەولێر و بەغدا.
نووسراوەكە جەختی كردووەتەوە لەوەی فەرمانبەرانی هەرێمی كوردستان بەپێی دەستوور، هەمان ئەرك و مافی فەرمانبەرانی حكومەتی فیدراڵییان هەیە و دروست نییە كە ناكۆكییە سیاسییەكان و كێشە داراییەكانی نێوان حكومەتی فیدراڵی و حكومەتی هەرێم كاریگەریی بكاتە سەر مووچەكانیان.
یاداشتی ئەو پەرلەمانتارانە پاش ئەوە هات كە چەند ڕۆژێك لەمەوبەر غالب محەمەد، ئەندامی پێشووی پەرلەمانی عێراق و ژمارەیەك لە نوێنەری مامۆستا و فەرمانبەرانی ناڕازیی هەرێم، سەردانی بەغدایان كرد و 60 هەزار واژوویان بۆ پێدانی مووچەی فەرمانبەرانی هەرێم ڕاستەوخۆ لەلایەن حكومەتی عێراقەوە لەگەڵ خۆیان برد.
غالب محەمەد، ئەندامی پێشووی پەرلەمانی عێراق، لە هەژماری خۆی لە فەیسبووك دەڵێت "لە سەردانەكەدا داوامان لە یوسف كیلابی كرد كە پرۆژەیاسایەك گەڵاڵە بكات سەبارەت بە پێدانی مووچەی مامۆستایان و فەرمانبەران بە شێوەی ڕاستەخۆ لە لایەن عێراقەوە، ئەمڕۆ لەلایەن بەرێزیان پڕۆژەكە نووسراوە و دراوە بە هەموو پەرلەمانتارەكان بۆ ئەوەی واژووی بكەن".
