پەرەگراف
جێگری سەرۆكی حكومەتی هەرێم ڕایدەگەیەنێت كە بەشداریی مووچەخۆران لە پرۆژەی هەژماری من "ئارەزوومەندایە" و مووچەخۆران "ئازادن" لەوەی بەشداریی تێدا دەكەن یان نا. دەشڵێت "فەرمانبەران دەتوانن بانكی تی بی ئای هەڵبژێرن".
قوباد تاڵەبانی، جێگری سەرۆكی حكومەتی هەرێم، لە پەراوێزی بەشداریكردنی لە كردنەوەی (ناوەندی كوردستان بۆ هونەر و كولتوور)، ڕایگەیاند "هەژماری من بەرنامەی حكومەتە بۆ پێدانی مووچە بە ڕێگای ئەلیكترۆنی، بەڵام تاكە ڕێگا نییە".
جێگری سەرۆكی حكومەتی هەرێم جەختی كردەوە كە "بەشداری لە هەژماری من ئارەزوومەندانەیە و مووچەخۆران سەرپشكن، هەر فەرمانبەرێك كە ویستی، دەتوانێت خۆی لەو پرۆژەیەدا تۆمار بكات، ئەوەی كە نایەوێت، زۆر ئازادە و دەتوانێت بچێت لە بانكەكانی دیكەدا خۆی تۆمار بكات".
قوباد تاڵەبانی ئاماژەی بە هاتنی بانكی (TBI) بۆ بەشداری لە پرۆسەی بەبانكیكردنی مووچەی مووچەخۆرانی هەرێم كرد و وتی "ئێستا تی بی ئایش هاتووەتە ناو بابەتەكەوە، فەرمانبەران دەتوانن ئەو بانكە هەڵبژێرن"
"هەژماری من بێت یان هەژمار تۆ، گرنگ نییە، گرنگ ئەوەیە بەغداد پارەی مووچە بنێرێت و دابەش بكرێت، گرنگ ئەوەیە ڕزگارمان ببێت لە دابەشكردنی مووچە بە گوێنی و زەرف"، جێگری سەرۆكی حكومەتی هەرێم وای وت.
هەڵوێستەكەی قوباد تاڵەبانی لە كاتێكدایە كە هەر ئەمڕۆ محەمەد شیاع سوودانی، سەرۆكوەزیرانی عێراق، سەرپەرشتیی كۆبوونەوەیەكی تایبەت بە بەدواداچوون بۆ ئەو ڕێوشوێنانە كرد كە گیراونەتە بەر بۆ بەبانكیكردنی مووچەی فەرمانبەران لە هەرێمی كوردستان.
سوودانی لە كۆبوونەوەكەدا جەختی لە جێبەجێكردنی بڕیارەكەی دادگای فیدراڵی كردووەتەوە بۆ بەبانكیكردنی مووچەی مووچەخۆرانی هەرێمی كوردستان. لەو چوارچێوەیەشدا فەرمانی كردووە بە "خێراكردنی تەواوكردن"ـی ڕێكارەكانی پرۆسەكە.
ئەمە لە كاتێكدایە پاش زیاتر لە سێ مانگ لە بڕیارەكەی دادگای فیدراڵی، تا ئێستا پرۆسەی بەبانكیكردنی مووچەی مووچەخۆرانی هەرێم بەو جۆرەی لە بڕیارەكەدا هاتووە، نەچووەتە بواری جێبەجێكردنەوە. وەزارەتی دارایی هەرێم ناردنی لیستی ناوی 821 فەرمانبەری بە دوو لیست بۆ بانكی تی بی ئای ڕاگەیاندووە، بەڵام دەڵێت "لە چوارچێوەی پرۆژەی هەژماری مندا" بەبانكیكردنی مووچە دەكات.
بەپێی بڕیارەكەی دادگای فیدراڵی، دەبێت پرۆسەی بەبانكیكردنی مووچەی مووچەخۆرانی هەرێم "لە بانكە حكومییە فیدراڵییەكانی دەرەوەی هەرێمی كوردستان" ئەنجام بدرێت. هەروەها پێشتر وەزارەتی دارایی عێراق ڕەتی كردووەتەوە كە بەبانكیكردنی مووچە لە چوارچێوەی پرۆژەی (هەژماری من)دا قبووڵ بكات، چونكە ئەو بانكانەی تێیدا بەشدارن، بانكی كەرتی تایبەتن.
لە دوای ئەوەی بانكی بازرگانیی عێراق (تی بی ئای) لەلایەن محەمەد شیاع سوودانی، سەرۆكوەزیرانی عێراقەوە ڕاسپێردرا بۆ ئەوەی پرۆسەی بەبانكیكردنی مووچەی مووچەخۆرانی هەرێم ئەنجام بدات. سوودانی ڕایشیگەیاند كە تی بی ئای لە ماوەی دوو مانگدا پرۆسەكەدا تەواو دەكات.
دواتر شاندی بانكی تی بی ئای لە هەولێر لەگەڵ حكومەتی هەرێم سەبارەت بە ئەنجامدانی پرۆسەی بەبانكیكردنی مووچە (تەوتین) كۆبووەوە. پاش كۆبوونەوەكە هەر لایەكیان ڕاگەیەندراوێكی بڵاو كردەوە و هەریەكەیان بە جۆرێك باس لە ئەنجامدانی پرۆژەكە دەكات.
وەزارەتی دارایی هەرێم ڕایگەیاند "بانكی عێراقی بۆ بازرگانی (TBI) بەشداری لە پڕۆژەی (هەژماری من) بۆ بە دیجیتاڵكردنی مووچە دەكات"، بەڵام بانكی تی بی ئای بە هیچ شێوەیەك باسی بەشداری لە پرۆژەی هەژماری من ناكات و دەڵێت "بەشداری لە پرۆسەی بەبانكیكردنی مووچەی فەرمانبەرانی هەرێم (تەوتین) دەكەین لەسەر داوای سەرۆكوەزیرانی عێراق و بەپێی بڕیارەكەی دادگای فیدراڵی".
ڕۆژی 25ـی ئەم مانگە، سۆران عومەر، ئەندامی پەرلەمانی عێراق، بە پەرەگرافی ڕاگەیاند "تا ئێستا بانكی تی بی ئای پرۆسەی بەبانكیكردنی مووچەی مووچەخۆرانی هەرێمی دەست پێ نەكردووە و بانکەکە داوای لیستی وەزارەتەکانی کردووە، بەڵام وەزارەتی دارایی تا ئێستا لیستی هیچ وەزارەتێکی بۆ نەناردووە.