پەرەگراف
محەمەد شیاع سوودانی، سەرۆكوەزیرانی عێراق، فەرمانی كرد بە خێراكردنی تەواوكردنی ڕێكارەكانی بەبانكیكردنی مووچەی مووچەخۆرانی هەرێم لە چوارچێوەی بڕیارەكەی دادگای فیدراڵیدا.
ئەمڕۆ دووشەممە، سوودانی سەرپەرشتیی كۆبوونەوەیەكی تایبەت بە بەدواداچوون بۆ ئەو ڕێوشوێنانە كردووە كە گیراونەتە بەر بۆ بەبانكیكردنی مووچەی فەرمانبەران لە هەرێمی كوردستان.
نووسینگەی ڕاگەیاندنی سەرۆكوەزیرانی عێراق ڕایگەیاند، سوودانی "جەختی لە جێبەجێكردنی بڕیارەكەی دادگای فیدراڵی كردەوە كە لە 21ی شوباتی 2024 دەرچووە، كە حكومەتی فیدراڵی و حكومەتی هەرێمی پابەند كردووە بە بەبانكیكردنی مووچەی فەرمانبەرانی كەرتی گشتیی هەرێمی كوردستان".
بەپێی ڕاگەیەندراوی نووسینگەكەی، سەرۆكوەزیرانی عێراق "بەدواداچوونی بۆ ئاستی جێبەجێكردنی ڕێكارەكان" لەگەڵ دادگای فیدڕاڵی و بانكە حكومییەكان لەسەر بەبانكیكردنی مووچەی مووچەخۆرانی هەرێم كردووە و ڕایگەیاندووە "پێویستە پەلە بكرێت لە تەواوكردنی تۆماركردنی داتاكانی فەرمانبەرانی هەرێمی كوردستانی عێراق و چیتر مووچەكانیان دوا نەكەوێت".
سوودانی دووپاتی كردووەتەوە كە "حكومەتی فیدڕاڵی پابەندە بە پاراستنی كارمەندان لە ڕۆڵەكانی گەلی عێراق لە هەر شوێنێك بن، هەروەها دەستەبەركردنی مافەكانیان بەپێی یاسا و دەستوور".