پەرەگراف
پاش دوو ڕۆژ لە كردنە ئامانجی بارەگایەكی هێزەكانی پێشمەرگە لە پیرمام بە درۆنی بۆمبڕێژكراو كە هیچ زیانێكی گیانیی لێ نەكەوتەوە، وەزارەتی پێشمەرگە "سەركۆنەی توند"ـی هێرشەكە دەكات و داوای پاڵپشتی بۆ "ڕاگرتنی ئەو پەلامارە نابەرپرسیارانە" دەكات.
وەزارەتی پێشمەرگە دەڵێت "بە توندی سەركۆنەی هێرشی درۆنی بۆمبڕێژكراو بۆ سەر بارەگایەكی هێزی پێشمەرگەی كوردستان دەكەین، كە لە 30-12-2023 لە سنوری پیرمام - هەولێر لەلایەن گرووپە لەیاسادەرچووەكانەوە ئەنجام درا".
وەزارەتەكە لەگەڵ جەختكردنەوە لەسەر ئەوەی كە "سەقامگیری، ئارامی و ئاسایشی هەرێمی كوردستان، زامنی ئارامی و سەقامگیریی عێراق و ناوچەكەشە"، دەڵێت "ئێمە لە وەزارەتی پێشمەرگە، بانگی حكومەتی عێراقی و تەواوی دۆستانمان لە هاوپەیمانیی نێودەوڵەتی دەكەین، كە پاڵپشتمان بن بۆ ڕاگرتنی ئەو پەلامارە نابەرپرسیارانەدا، كە دەبێتە هۆی ئاشووبی زیاتر بۆ هەرێم و عێراق و ناوچەكە بە گشتی".
وەزارەتی پێشمەرگە داوای "هەرچی زووە دۆزینەوە و بە سزای یاسایی گەیاندنی بكەرانی ئەو كارە تیرۆریستییانە" دەكات، دووپاتیشی دەكاتەوە "هێزی پێشمەرگەی كوردستان، وەكوو هەمیشە بۆ پاراستنی خاك و میللەتەكەمان، مافی بەرپەرچدانەوەی پێویست و گونجاوی دەبێت".
دوێنێ، پێشەوا هەورامی، وتەبێژی حكومەتی هەرێم لە ڕاگەیەندراوێكدا ئاشكرای كرد "شەوی (شەممە، 30-12-2023)، كاتژمێر 11:45 خولەك، بە دوو درۆنی بۆمبڕێژكراو هێرش كرایە سەر بارەگایەكی هێزی پێشمەرگەی كوردستان لە سنووری پیرمام - هەولێر كە خۆشبەختانە زیانی گیانیی نەبووە و تەنیا زیانی ماددیی لێ كەوتەوە".
مەسروور بارزانی، سەرۆكی حكومەتی هەرێم، هێرشەكەی بە "تیرۆریستی" ناو برد و نیگەرانیی قووڵی لەوباریەوە ڕاگەیاند. داوایشی لە محەمەد شیاع سوودانی، سەرۆكوەزیرانی عێراق كرد "بە كردەوە ڕێكاری پێویست بگرێتە بەر بۆ وەستاندنی ئەو هێرشانە و سزادانی گرووپەكان و كۆنترۆڵكردنی ئەو ناوچانەی بۆ هێرش بەكار دەهێنرێن".
مەسروور بارزانی وتیشی "ئێمە باش لەو یارییانە تێدەگەین كە كەسانی لەیاسادەرچوو لە پشتیانەوەن، مافی ئەوەشمان هەیە بەرگری لە گەلەكەمان بكەین".
دوای هێرشەكە، شانەی ڕاگەیاندنی ئەمنیی عێراق هێرشەكەی بۆ سەر هەولێر بە "تاوانكار"ـی ناو بۆد و ڕایگەیاند كە محەمەد شیاع سوودانی، سەرۆكوەزیران و فەرماندەی گشتیی هێزە چەكدارەكانی عێراق، فەرمانی كردووە بە دەزگا ئەمنییەكان "لێكۆڵینەوەیەكی گشتگیر" بكەن.
وتەبێژی حكومەتی هەرێم لە ڕاگەیەندراوێكدا حكومەتی فیدراڵی تۆمەتبار كرد بەوەی كە "بودجە و مووچە" بە گرووپانە دەدات كە هێرشەكان ئەنجام دەدەن و "چەكدار"یان دەكات، وتیشی "بە بەرچاوی حكومەتی عێراقەوە هاتووچۆ دەكەن و چەك و موشەك و درۆن دەگوازنەوە و هێرشی تیرۆریستی دەكەنە سەر دامودەزگا فەرمی و سەربازییەكان".
پێشەوا هەوارمی، وتەبێژی حكومەتی هەرێم دەشڵێت "لە كاتێكدا كە حكومەتی عێراق بێ دەنگ و بێ توانایە بەرامبەر ئەو گرووپانە، بەڵام ئازایە لە بڕینی قووتی خەڵكی كوردستان و بە هەمان پارە ئەم گرووپانە پارەدار دەكرێن".
دواتر حكومەتی عێراق "سەرسوڕمان"ـی خۆی لە ڕاگەیەندراوەكەی وتەبێژی حكومەتی هەرێم ڕاگەیاند و وتی "تۆمەتی جۆراوجۆری ناڕاستەقینە و نابەرپرسانەی لەخۆ گرتووە".
باسم عەوادی، وتەبێژی حكومەتی عێراق، لە ڕاگەیەندراوێكدا وتی "لێدوانەكەی وتەبێژی حكومەتی هەرێم "زانیاریی چەواشەكارانە و درۆ"ـی تێدایە، "بەتایبەتی تۆمەتی برسیكردنی هاووڵاتیانی هەرێم".
"دووپاتی دەكەینەوە كە پەلەكردن لە بڕیاردان و لێدوانێك كە وردبینیی تێدا نییە، بەشداریییە لە ئاڵۆزكردنی دیمەنی سیاسی و حكومی، ئەو لێدوانە نابنیاتنەرانە زیان بە دۆخی سەقامگیری سیاسی و كۆمەڵایەتی دەگەیەنێت"، وتەبێژی حكومەتی عێرا وای وت.
باسم عەوادی جەختی كردەوە كە حكومەتی فیدراڵی ڕێكاری گرتووەتە بەر بۆ لێكۆڵینەوە لەو هێرشە و ڕایگەیاند "حكومەتی عێراق هەر هێرشێك ڕەت دەكاتەوە كە بكرێتە سەر خاكی عێراق، چ لە هەرێم بێت یان باقیی پارێزگاكان".