فیدان داوای یەكخستنی تواناكانی توركیا و عێراق و سووریا دەكات بۆ لەناوبردنی 'داعش و پەكەكە'
پەرەگراف
هاكان فیدان، وەزیری دەرەوەی توركیا، لە بەغداوە پەكەكە بە "هەڕەشە و مەترسی" بۆ سەر عێراق و توركیا و سووریا ناو دەبات و دەڵێت "چاوەڕوانیی ئێمە لە عێراق ئەوەیە كە ڕێكخراوی قەدەغەكراوی پەكەكە، وەك ڕێكخراوێكی تیرۆریستی بناسێنێت". هەروەها داوای "یەكخستنی هەموو تواناكان"ـی ئەو سێ وڵاتە دەكات بۆ "لەناوبردنی داعش و پەكەكە".
هاكان فیدان بەیانیی ئەمڕۆ بە سەردانێك گەیشتە بەغدا و لەلایەن فوئاد حسێن، وەزیری دەرەوەی عێراق، پێشوازیی لێ كرا و دواتر كۆبوونەوە. بڕیارە لەگەڵ محەمەد شیاع سوودانی، سەرۆكوەزیرانی عێراقیش كۆببێتەوە.
وەزیرانی دەرەوەی عێراق و توركیا كۆنگرەیەكی ڕۆژنامەونییان ئەنجامدا و تێیدا فوئاد حسێن ڕایگەیاند "گفتوگۆمان دەربارەی چۆنێتیی جێبەجێكردنی ڕێككەوتنەكانی نێوانمان كرد. توركیا و عێراق لە زۆر بابەت و پرسی گرنگدا هەماهەنگی دەكەن. دۆخی سووریا پرسێكی گرنگ و جێی بایەخی هەردوو وڵاتە".
هەروەها هاكان فیدان وتی "لە ڕوانگەیەكی ستراتیژییەوە سەیری عێراق دەكەین و لە سەردانی ساڵی ڕابردووی سەرۆككۆمار ئەردۆغان بۆ عێراق، ٢٧ ڕێككەوتننامەی ستراتیژیمان واژوو كرد".
فیدان ئاماژەی بەوەش كرد كە "قەبارەی بازرگانیی ساڵانەی نێوان عێراق و توركیا نزیك بووەتەوە لە ٢٠ ملیار دۆلار".
وەزیری دەرەوەی توركیا، سەقامگیریی عێراقی بە سەقامگیریی ناوچەكەیە ناو برد و وتی "عێراق دراوسێیەكی زۆر گرنگە. سەروەری و ئاسایش و سەقامگیریی عێراق بۆ ئێمە زۆر گرنگە".
سەبارەت بە دۆسیەی پەكەكە، فیدان جارێكی دیكە چاوەڕوانیی ئەنقەرەی دووپات كردەوە بەوەی كە پاش بڕیاری قەدەغەكردنی، "وەكوو ڕێكخراوێكی تیرۆریستی بیناسێنێت" و وتی "پەكەكە هەڕەشە لە سەقامگیریی عێراق دەكات و دوو سەربازی عێراقی شەهید كرد".
توركیا لە ساڵانی ڕابردوودا هەوڵەكانی چڕ كردەوە بۆ ئەوەی پەكەكە لەلایەن عێراقەوە بە "ڕێكخراوێكی تیرۆریستی" بناسێنرێت، بەڵام تا ئێستا عێراق نەچووەتە ژێر باری وەها بڕیارێك. دیارترین بڕیار كە عێراق دژی پەكەكە دابێتی، ناساندنێتى وەكوو "ڕێكخراوێكی قەدەغەكراو"، کە لە سەردانەکەى ساڵى ڕابردووى ئەردۆغان بۆ بەغدا ڕاگەیەندرا.
ڕۆژى ٢٢-٠٤-٢٠٢٤، ڕەجەب تەیب ئەردۆغان، سەرۆککۆمارى تورکیا، سەردانى بەغداى کرد و لەگەڵ محەمەد شیاع سوودانى، سەرۆکوەزیرانى عێراق، ژمارەیەک ڕێککەوتنیان واژوو کرد.
لە كاتێكدا سەرۆككۆماری توركیا و سەرۆكوەزیرانی عێراق لە كۆبوونەوەدا بوون، باسم عەوادی، وتەبێژی حكومەتی عێراق، كۆنفرانسێكی ڕۆژنامەوانیی ئەنجام دا و تێیدا پارتی كرێكارانی كوردستان (پەكەكە)ـی بە "ڕێكخراوێكی قەدەغەكراو" ناو برد.
وتەبێژی حكومەتی عێراق لە پەراوێزی سەردانەكەی شاندی باڵای توركیا بۆ بەغدا، بۆ میدیاكان وتی "لیژنەی ئاسایشی عێراق، پارتی كرێكارانی كوردستان (پەكەكە)ـی وەكوو ڕێكخراوێكی قەدەغەكراو پۆلێن كردووە و لەسەر ئەو بنەمایە مامەڵە لەگەڵ پەكەكەدا دەكرێت".
دواتریش ئەنجوومەنی وەزیرانی عێراق بە نووسراوی فەرمی داواى لە دامەزراوە و فەرمانگەكانی دەوڵەت کرد كە پەكەكە بە "ڕێكخراوی قەدەغەكراو" ناو بهێنن.