كۆمیسیۆنی عێراق: ئەستەمە ئێستا بتوانین وادەی هەڵبژاردنی پەرلەمانی كوردستان دیاری بكەین
پەرەگراف
كۆمیسیۆنی هەڵبژاردنەكانی عێراق ڕایدەگەیەنێت كە "یاسای هەڵبژاردن لە هەرێمی كوردستان"ی بەدەست نەگەیشتووەتە، بۆیە لە ئێستادا ئەستەمە بتوانن هیچ وادەیەك بۆ ئەنجامدانی هەڵبژاردنی پەرلەمانی كوردستان دیاری بكەن، بەڵام جەخت دەكاتەوە كە ئامادەكارییان بۆ ئەنجامدانی هەڵبژاردنەكە دەست پێ كردووە. هەروەها ئێستا ناوەندەكانی نوێكردنەوەی تۆماری دەنگدەران لە پارێزگاكانی هەرێم كراوەن بۆ دەنگدەران.
هەرچەندە دەنگۆی ئەوە هەبوو كە ئەمڕۆ كۆمیسیۆنەكە سەبارەت بە هەڵبژاردن وەڵامی سەرۆكایەتیی هەرێم بداتەوە، بەڵام سەرۆكی تیمی میدیایی كۆمسیۆنی باڵای سەربەخۆی هەڵبژاردنەكانی عێراق ئاشكرای دەكات كە لە كۆبوونەوەی هەفتەی داهاتوویان تاوتوێی ئەو بابەتە دەكەن.
عیماد جەمیل، سەرۆكی تیمی میدیایی كۆمسیۆنی باڵای سەربەخۆی هەڵبژاردنەكانی عێراق، لە لێدوانێكیدا بۆ ئاژانسی هەواڵی عێراق ڕایگەیاند "نووسراوێك گەیشتووەتە ئەنجوومەنی كۆمیسیارانی كۆمیسیۆنی باڵای سەربەخۆی هەڵبژاردنەكان لەبارەی هەڵبژاردن لە هەرێمی كوردستان، ئەم نامەیە دەخرێتە كارنامەی كۆبوونەوەی داهاتووی ئەنجوومەنەكە، تاوتوێی ناوەڕۆكەكەی و میكانیزمی كاركردن و ڕێكارەكانی تایبەت بە هەڵبژاردن دەكرێت، دواتر وردەكارییەكەی ڕادەگەیەندرێت".
عیماد جەمیل باس لە ئامادەكارییەكان بۆ هەڵبژاردنی پەرلەمانی كوردستان دەكات و دەڵێت "لەو چوارچێوەیەدا كۆمیسیۆن 173 ناوەندی تۆماركردنی دەنگدەرانی لە دهۆك، سلێمانی و هەولێر كردووەتەوە و ڕۆژانە لە كاتژمێر ٨ی بەیانییەوە تاوەكوو ٣ی دوانیوەڕۆ جگە ڕۆژەكانی پشوو و هەینی و شەممە، پێشوازی لە دەنگدەران دەكات".
سەرۆكی تیمی میدیایی كۆمیسیۆنی باڵای سەربەخۆی هەڵبژاردنەكانی عێراق جەخت دەكاتەوە كە "كە ناتوانین هەڵبژاردنی پەرلەمانی كوردستان لەگەڵ هەڵبژاردنی ئەنجوومەنی پارێزگاكان لە عێراق ئەنجام بدەین، كە بڕیارە لە ١٨ی كانوونی یەكەمی ٢٠٢٣ ئەنجام بدرێت".
هاوكات بە گوتەی عیماد جەمیل، تا ئێستا لە سەرانسەری هەرێمی كوردستان تەنها "هەزار و ٥٠٠ دەنگدەر" زانیارییەكانی خۆیان نوێ كردووەتەوە. ئاماژە بەوەش دەكات كە میكانیزمی هەڵبژاردن لە هەرێمی كوردستان جیاوازە و ژمارەی دەنگدەران لە هەرێم "سێ ملیۆن و ٦٤١ هەزار و ٥٦٦ دەنگدەرە".
* سەرۆكایەتیی هەرێم بە فەرمی داوا لە كۆمیسیۆنی عێراق دەكات سەرپەرشتیی هەڵبژاردنی كوردستان بكات
سەبارەت بە كۆمیسیۆنی هەرێم، عیماد جەمیل تەئكید لەوە دەكاتەوە كە "كارەكانی كۆمیسیۆنی باڵای هەڵبژاردن و ڕاپرسی لە هەرێمی كوردستان كۆتایی هاتووە و ناتوانن هیچ ڕۆڵێكیان لەم هەڵبژاردنە هەبێت، هەڵبژاردنی پەرلەمانی كوردستان لەلایەن كۆمیسیۆنی باڵای سەربەخۆی هەڵبژاردنەكانی عێراق بەڕێوە دەبرێت".
"ئامادەكاریی تەكنیكی و كارگێڕی هەیە و كۆمیسیۆنی باڵای سەربەخۆی هەڵبژاردنەكانی عێراق ئۆفیسی لە هەرێمی كوردستان هەیە كە لەلایەن هەزار و ٥٠٠ كارمەندەوە بەڕێوە دەبرێن"، عیماد جەمیل وا دەڵێت.
سەرۆكی تیمی میدیایی كۆمیسیۆنی باڵای سەربەخۆی هەڵبژاردنەكانی عێراق ئەوەیشی خستەڕوو كە كۆمیسیۆن ڕێگە بە گواستنەوەی تۆماری دەنگدەران لە نێوان پارێزگاكانی هەرێمی كوردستان یان لەناو پارێزگایەكدا دەدات، بەڵام ڕێگە بە گواستنەوەی تۆماری دەنگدەران بۆ ناو هەرێمی كوردستان یان دەرەوەی و بەپێچەوانەوە نادرێت.