پەرەگراف
پەكەكە دەستپێكردنی هەنگاوی كشانەوەی ئەو هێزانەی ڕاگەیاند كە لەناو خاكی توركیادان و ڕایگەیاند، بە فەرمانی عەبدوڵڵا ئۆجەلان لە چوارچێوەیەی بڕیارەكانی كۆنگرەی ١٢دا ئەو هەنگاوە دەنێت و بەشێک لە گەریلاکانى کشانەوەکەیان ئەنجام داوە.
لە كۆنگرەیەكی ڕۆژنامەوانیدا كە لە قەندیل بەڕێوە چوو، دەستەیەكی پەكەكە لەژێر ناوی "بەڕێوەبەرایەتیی تەڤگەری ئازادی"، ڕایگەیاند "ئەو هێزانەی لەبەردەم ئەگەری مەترسی پێكداداندان و زەمینە لەبارن بۆ ڕوودانی ئەگەری نەخوازراو، لە ناوچە سنوورییەكانی توركیاوە بەرەو هەرێمەكانی پاراستنی مەدیا دەكشێنەوە".
ئەمە هەنگاوى دووەمى پەکەکە بۆ جێبەجێکردنى بڕیارەکانى کۆنگرەى ١٢ـى پارتەکە کە لەسەر داواى عەبدوڵڵا ئۆجەلان، ڕێبەرى زیندانیکراوى پەکەکە و لە چوارچێوەى پرۆسەى ئاشتیدا، لە ٥ تا ٧ـى ئایارى ئەمساڵ بەڕێوەچوو و تێیدا بڕیارى هەڵوەشاندنەوەى پەکەکە درا. لە هەنگاوى یەکەمدا لە ڕۆژى 11-07-2025، گرووپێكی ٣٠ كەسیی گەریلا بە پێشەنگایەتیی بەسێ هۆزات، هاوسەرۆكی كۆنسەی بەڕێوەبەریی كەجەكە، لە مەراسێمێكی سیمبولیكدا لە ئەشكەوتی جاسەنەی سنووری سلێمانی، چەكەكانیان سووتاند.
بەشێك لەو گەریلایانەی كە لە ماوەى ڕابردوودا لە سنوورى تورکیا كشاونەتەوە، لە كاتی كۆنگرە ڕۆژنامەوانییەكەى ئەمڕۆدا ئامادە بوون. پەكەكە ڕایگەیاند "لەو سەنگەرانەی ناوچە سنوورییەكانیشدا كە ئەگەری پێكدانان و هەر ئەگەرێكی نەخوازراویان لەسەرە، ڕێوشوێنی هاوشێوە و سازەندانە گیراونەتە بەر".
بەیاننامەی پەكەكە لەلایەن سەبری ئۆك، ئەندامی دەستەی بەڕێوەبەری كەجەكە خوێندرایەوە. هەریەك لە ڤەژین دەرسیم، ئەندامی دەستەی بەڕێوەبەری هەرێمی یەژاستاری سەرحەد و دەڤریم پالو، فەرماندەی فەرمانداری هەپەگە و ٢٥ گەریلا لە كۆنگرە ڕۆژنامەوانییەكەدا بەشار بوون.
لە بەیاننامەی پەكەكەدا هاتووە "زۆر ڕوون و ئاشكرایە كە ئێمە پابەندین بە بڕیارەكانی كۆنگرەی ١٢ـە و بە بڕیاریشین لە جێبەجێكردنیدا. بەڵام بۆ جێبەجێكردنییان پێویستە دەستبەجێ ئەو هەنگاوە یاسایی و سیاسییانەی پرۆسەكە بنرێن كە مەرجی بڕیارەكانی كۆنگرەی ١٢ـی پەكەكە بوون".
"بۆ ئەم مەبەستە پێویستە یاسای ڕاگوزەری تایبەت بە پەكەكە بە بنچینە وەربگیردرێت، بۆ بەشداریكردن لە سیاسەتی دیموكراتییانەش دەستبەجێ یاساكانی پەیوەست بە ئازادیی پێویست و ئەنتیگراسیۆنی دیموكراتی دەربكرێن"، پەكەكە وا دەڵێت.
هەر لە كۆنگرە ڕۆژنامەوانییەكەدا بەرپرسانی پەكەكە داوایان كرد ئەو كۆمیسیۆنەی لە پەرلەمانی توركیا پێكهێنراوە، هەرچی زووە سەردانی ئۆجەلان بكەن، ئەوەش لەپێناو خێراكردن و گرتنبەری ڕێكارە پێویستەكانی پەیوەست بە پرۆسەی ئاشتی.
دەقی بەیاننامەكە پەکەکە:
بۆ ڕایگشتی
دوای گەیشتنی شەڕ و پێكدادانەكانی ڕۆژهەڵاتی ناوەڕاست بە ئاستی مەترسی زۆر جدی لەسەر ئایندەی كورد و توركیا، ساڵی ڕابردوو لەسەر بانگەوازییەكانی سەرۆككۆماری توركیا و سەرۆكی گشتی مەهەپە دەوڵەت باخچەلی و پاشان ڕێبەر عەبدوڵا ئۆجالان پرۆسەیەك دەستی پێكرد و ئەم پرۆسەیەش كە بە بانگەوازی “ئاشتی و كۆمەڵگەی دیموكراتیك”ـی ڕێبەر عەبدوڵا ئۆجالان لە ٢٧ـی شووباتی ٢٠٢٥ـدا بە ناسنامەی خۆی گەیشت، بە قۆناخێكی تا دواڕادە گرنگ و هەستیاردا دەگوزەرێت.
ئێمەی لایەنی كورد لەلایەن خۆمانەوە لە ماوەی هەشت مانگی ڕابردوودا لەسەر بنچینەی بانگەوازی ئاشتی و كۆمەڵگەی دیموكراتیك هەنگاوی گەورەی مێژووییمان نا. دوابەدوای بانگەوازییەكە و لە ڕۆژی ١ـی ئاداردا بە ئامانجی بەرقەراركردنی زەمینەیەكی ئارام و ئاسوودە بۆ گفتوگۆكردن ئاگربەستمان ڕاگەیاند. ڕێبەر عەبدوڵا ئۆجالان بە ڕێبازی گونجاو ئاراستەی نیشاندا و لەسەر ئەو بنەمایەش پەكەكە لە ڕۆژانی ٥-٧ـی ئایاردا، ١٢ـیەمین كۆنگرەی خۆی سازدا و بڕیارماندا بە كۆتاییهێنان بە هەبوونی ڕێكخراوەیی پەكەكە و ستراتیژییەتی تێكۆشانی چەكداری و ئەو بڕیارەشمان لەسەر زیاد كرد كە تەنیا بە سەرپەرشتی ڕاستەوخۆیانەی ڕێبەر عەبدوڵا ئۆجالان دەتوانرێت پراكتیزە بكرێن. دوای دوو مانگ و لە ١١ـی تەمووزدا، دوای بانگەوازی بەدیمەنی ڕێبەر عەبدوڵا ئۆجالان گرووپی ئاشتی و كۆمەڵگەی دیموكراتیك كە لە ٣٠ كەس پێكهاتبوو و بە پێشەنگایەتی هاوسەرۆكی كۆنسەی بەڕێوەبەری كەجەكە بەسێ هۆزات، لە مەراسیمێكدا چەكەكانیان سووتاند و بە ڕوونی و كرداریی هەڵوێست و بە بڕیارداریمانەوە لە كۆتاییهێنان بە تێكۆشانی چەكداری سەلماند.
ئەم هەنگاوە مێژووییانەی لایەنی كورد كە بە پێشەنگایەتی ڕێبەر عەبدوڵا ئۆجالان و پەكەكە ئەنجامی دان، كاریگەرییەكی قوڵی لە كەشوهەوای سیاسی و كۆمەڵایەتی توركیا كرد و گیان و ئیرادەیەكی نوێی لە بواری ئاشتی و دیموكراتیزەبووندا خستەڕوو. ئەم هەڵوێستە بوێرانە و فیداكارانەیەی كورد كە هەمیشە لایەنگری ئاشتی و دیموكراسی و ئازادیی بووە، بەشێوەیەكی گشتی لە ناوخۆ و دەرەوەی توركیاش پێشوازییەكی گەرمی لێكرا.
سەرەڕای هەڵوێستە ناتەواوەكانی لایەنی بەرامبەر، ڕێبەر عەبدوڵا ئۆجالان و بزووتنەوەی ئازادیخوازی كوردستان بە ئامانجی وەلاوەنانی هەموو ئەو مەترسییە سەختانەی بەرۆكی كورد و توركیای گرتووە، بۆ ئەوەی بتوانرێت بناخەی ژیانی ئازادی، دیموكراتیك و برایەتی سەدەی داهاتوو دابنرێت و پرۆسەی ئاشتی و كۆمەڵگەی دیموكراتی بە قۆناخی دووەم بگەیەندرێت، لە هەوڵی هەنگاوی نوێی كردارییدایە. لەم چوارچێوەیەدا و لەسەر بنچینەی بەرنامە و بڕیارەكانی كۆنگرەی ١٢ و بە دەستووری ڕێبەر عەبدوڵا ئۆجالان دەستمانكرد بە هەنگاوی كشانەوەی ئەو هێزانەمان لە توركیا لەبەردەم ئەگەری مەترسی پێكداداندان و زەمینە لەبارن بۆ ڕوودانی ئەگەری نەخوازراو. كشانەوەكە لە ناوچە سنوورییەكانی توركیاوە بەرەو هەرێمەكانی پاراستنی مەدیا دەكرێت و بەشێك لەو گرووپانەی گەیشتوون بە هەرێمەكانی پاراستنی مەدیا ئێستاكە لێرە ئامادەن و بەشدارن لەم كۆنگرە ڕۆژنامەنووسییەدا. هاوكات لەو سەنگەرانەی ناوچە سنوورییەكانیشدا كە ئەگەری پێكدانان و هەر ئەگەرێكی نەخوازراویان لەسەرە، ڕێوشوێنی هاوشێوە و سازەندانە گیراونەتەبەر.
بێگومان پراكتیك دەبێتە نیشاندەری ئاستی كاریگەری ئەم هەنگاوانەمان. بەڵام ئەم هەنگاوە كردارییانەشمان جارێكی تر بەبڕیاربوون و هەڵوێستی ڕوونمان سەبارەت بە جێبەجێكردنی بڕیارەكانی كۆنگرەی ١٢ دەسەلمێنێت.
زۆر ڕوون و ئاشكرایە كە ئێمە پابەندین بە بڕیارەكانی كۆنگرەی ١٢ـوە و بەبڕیاریشین لە جێبەجێكردنی دا. بەڵام بۆ جێبەجێكردنییان پێویستە دەستبەجێ ئەو هەنگاوە یاسایی و سیاسییانەی پرۆسەكە بنرێن كە مەرجی بڕیارەكانی كۆنگرەی ١٢ـی پەكەكە بوون. بۆ ئەم مەبەستە پێویستە یاسای ڕاگوزەری تایبەت به پەكەكە بە بنچینە وەربگیردرێت و بۆ بەشداریكردن لە سیاسەتی دیموكراتییانەش دەستبەجێ یاساكانی پەیوەست بە ئازادی پێویست و ئەنتیگراسیۆنی دیموكراتی دەربكرێن.
بانگەوازییەكەمان بۆ تێكڕای گەلەكەمانە بەتایبەتیش ژنان و گەنجان. ڕۆژ؛ ڕۆژی چاوەڕوانیكردن نییە، ڕۆژی تێكۆشانی ڕێكخراوەییە بۆ بەدیهێنانی ژیانی ئازادی و دیموكراسی. هەر بۆیە هەر كەسێك خۆی لەم ژیانەدا دەبینێتەوە پێویستە لە ئاستی هەڵمەتی سەرتاسەریدا بۆ سەركەوتنی “پرۆسەی ئاشتی و كۆمەڵگەی دیموكراتی” تێبكۆشێت.
مانیفێستی ئاشتی و كۆمەڵگەی دیموكراتیك مسۆگەر سەردەكەوێت.
٢٦/١٠/٢٠٢٥
بەڕێوەبەرایەتی تەڤگەری ئازادیی