ڕێككەوتنی سێقۆڵیی دەستپێكردنەوەی هەناردەی نەوتی هەرێمی كوردستان لە هەولێر واژوو كرا
پەرەگراف
ڕێككەوتنی سێقۆڵیی دەستپێكردنەوەی هەناردەی نەوتی هەرێمی كوردستان لە هەولێر واژوو كرا و چاوەڕوان دەكرێت بە زوویی هەناردەكردنی نەوت لە ڕێگەی كۆمپانیای سۆمۆی عێراقییەوە دەست پێ بكاتەوە.
ڕێككەوتنەكە لەنێوان وەزارەتی سامانە سروشتییەكان، شاندی وەزارەتی نەوتی عێراق و كۆمپانیاكانی بەرهەمهێنانی نەوتی هەرێمی كوردستان واژوو كراوە و هەرسێ لا لەسەر وردەكاریی هەناردەكردنەوەی نەوت ڕێككەوتوون.
هێشتا وردەكاریی ڕێككەوتنەكە ئاشكرا نەكراوە، بەڵام خاڵی گرنگی ڕازیكردنی كۆمپانیا بیانییەكانی بەرهەمهێنانی نەوتی هەرێمی كوردستانە بە ڕادەستكردنی نەوت بە كۆمپانیای سۆمۆ، كە پێشتر مەرج و داواكارییەكانی ئەو كۆمپانیایانە لەمپەری بەردەم پرۆسەكە بوو.
بڕیارە دەقی ڕێككەوتنەكە سبەی سێشەممە لە كۆبوونەوەی ئەنجوومەنی وەزیرانی عێراقدا پەسەند بكرێت و وردەكارییەكەی ئاشكرا بكرێت. چاوەڕوانیش دەكرێت لە چەند ڕۆژی داهاتوودا ئامادەكارییەكانی دەستپێكردنەوەی هەناردەی نەوتی هەرێمی كوردستان تەواو بكرێت و پرۆسەكە دەست پێ بكاتەوە.
وەزارەتی سامانە سروشتییەكان ئەو بڕە نەوتەی كە لەبەردەستدایە، ڕادەستی كۆمپانیای بەبازاڕكردنی نەوتی عێراق (سۆمۆ)ـی دەكات بۆ هەناردەكردنەوە، جگە لە 50 هەزار بەرمیل كە بۆ پێویستیی ناوخۆی هەرێم بەكار دەهێنرێت.
هەناردەی نەوتی هەرێمی كوردستان لە 25ـی ئاداری 2023ـەوە ڕاگیراوە، ئەوەش بە بڕیاری دادگای ناوبژیوانیی پاریس لەسەر سكاڵایەكی عێراق دژی توركیا. هەرچەندە بەزوویی عێراق و توركیا و حكومەتی هەرێمیش ئامادەییان بۆ دەستپێكردنەوەی ڕاگەیاند، بەڵام مەرج و داواكاریی كۆمپانیا نەوتییەكان لەمپەر بوو.
كۆمپانیا بیانییەكانی نەوتی هەرێمی كوردستان بەردەوام جەختیان لە كاركردن بە گرێبەستە نەوتییەكانی پێشووی خۆیان لەگەڵ حكومەتی هەرێم دەكردەوە، هەروەها داوای گرەنتیی پێدانەوەی قەرزەكانیان و گرەنتیی پێدانی شایستەی بەرهەمهێنانی نەوت لە ئێستا و داهاتوودا دەكردەوە.