وەزارەتی دارایی هەرێم: بانكی پەرەپێدانی نێودەوڵەتی لە پڕۆژەی هەژماری من دوورخرایەوە
پەرەگراف
وەزارەتی دارایی حكومەتی هەرێمی كوردستان ڕایگەیاند، بانكی پەرەپێدانی نێودەوڵەتی (IDB) لە پڕۆژەی هەژماری من دوورخرایەوە و دەڵێت "بانكەكە لەمەودوا بەشێك نابێت لە پڕۆژەی هەژماری من، بەهۆی سنوورداركردنی خزمەتگوزارییە بانكییەكانی لەلایەن بانكی ناوەندیی عێراق، لە ڕووی مامەڵەكردن بە دۆلار".
وەزارەتەكە سەبارەت بە چارەنووسی ئەو مووچەخۆرانەی كە ئێستا لە بانكی پەرەپێدانی نێودەوڵەتی تۆمار كراون، دەڵێت "لە ڕێگەی سەنتەری خزمەتگوزاریی پڕۆژەی هەژماری منەوە پەیوەندییان پێوە دەكرێت و ئاگادار دەكرێنەوە لەبارەی گواستنەوەی هەژمارەكانیان بۆ یەكێك لە بانكەكانی دیكەی ناو پڕۆژەكە".
پڕۆژەی هەژماری من لە مانگی شوباتی ساڵی 2023 لەلایەن مەسروور بارزانی، سەرۆكی حكومەتی هەرێمی كوردستانەوە ڕاگەیەندرا. حكومەتی هەرێمی كوردستان دەڵێت "تاوەكو ئێستا 900 هەزار و 600 مووچەخۆری حكومی لە پڕۆژەی هەژماری من بۆ بەبانكیكردنی مووچەكانیان خۆیان تۆمار كردووە، لەو ژمارەیە 465 هەزاریان كارتی بانكییان بۆ دروست كراوە و مووچەكانیان بەشێوەی دیجیتاڵی وەردەگرن".
وەزارەتی دارایی جەخت دەكاتەوە كە "پڕۆژەی هەژماری من بەردەوام دەبێت لە كاركردن لەگەڵ حەوت لە بانكە هاوبەش و ڕێگەپێدراوەكان"، كە ئەو بانكانە "تەواو پابەندن بە ڕێنمایی و پێوەرەكانی بانكی ناوەندیی عێراقی و توانای مامەڵەكردنیان بە دۆلار هەیە، ئەمەش ڕێگە بە سوودمەندانی پڕۆژەی هەژماری من دەدات لەوەی كارتە بانكییەكانیان لە ناوەوە و دەرەوەی عێراق بەكاربهێنن".
نوێ دەكرێتەوە...