میترۆ: ڕۆژى شەڕەکەى لالەزار، هێزى چەکدار هەڵیانکوتاوەتە سەر ئۆفیسێکى ڕێکخراوە ناوخۆیى و بیانییەکان

پەرەگراف

سەنتەری میترۆ ئاشكرای دەكات كە لە كاتی شەڕەكەی لالەزار، هێزی چەكدار هەڵیانكوتاوەتە سەر تەلارێك كە ئۆفیسی ڕێكخراوی ناوخۆیی و نێودەوڵەتیی تێدایە، سەرجەم كەرەستەی ڕێكخراوەكان لە "قاسەی پارە تا فڵچەی ددانشتن"یان بردووە. میترۆ سەرباری سەركۆنەكردنی ئەو كارە، هۆشداریش دەدات كە "مەترسیی ئەوە هەیە هەرێمی كوردستان بخاتە زۆنی سوور بۆ كاری ڕێكخراوی بیانی".

17 ڕۆژ بەسەر ڕووداوەكەی هۆتێل لالەزاردا تێپەڕیوە، تازە هەڵكوتانە سەر (ئۆفیسی پایا) ئاشكرا دەكرێت، كە دەكەوێتە گەڕەكی سەرچناری شاری سلێمانی و نزیك هۆتێل لالەزار. میترۆ سەرباری پشتڕاستكرنەوەی زانیارییەكان، بەڵام سەرسوڕمان لەوە نیشان دەدات كە "كەس ئامادە نییە بە ناوی خۆی و ڕێكخراوەكەی لێدوان بدات و بێدەنگن".

بەپێی ڕاگەیەندراوەكەی میترۆ، چەند ڕێكخراوێكی كەلتووری و ژینگەیی و ڕێكخراوێكی نێودەوڵەتی لەو تەلارە ئۆفیسیان هەیە، وەك: ڕێكخراوی بەهرەدار بۆ پەرەپێدانی گەنجان، پایا ئەیجنسی، ئارت پلەس، پارێزەرانی ئاوی عێراق و كوردستان، ڕێكخراویUPP ـی ئیتاڵی.

میترۆ زانیارییەكانی لە چەند سەرچاوەیەك وەرگرتووە كە نەیانویستووە ناویان بڵاو بكرێتەوە، تەنانەت ئەو ڕێكخراوانە خۆیان 17 ڕۆژە لە ڕووداوەكە بێدەنگن.

سەنتەری میترۆ دەڵێت "ئەمڕۆ زانیمان هێزەكە سەرجەم كەرەستەی ناو ئۆفیسی ڕێكخراوەكانی بردووە، لەوانە: قاسەی پارە بەوەی لەناویدا بووە كە پارەی پرۆژەكان بووە، چوار پرینتەر، تەلەفۆنی سەتەلایتی سوورەیا، چەند سێتێكی كۆمپیوتەر، نۆ لاپتۆپی جۆراو جۆر، سێتی داتاشۆ، سێ‌ سێتی كامێرای سۆنی و كانوون، ئامێری مای فای ئاسیا سێڵ و فاست لینك و ئای كیو، ئامێری ژماردنی پارە، چەند شاشەیەكی تیڤی، پاسۆرتی كارمەند، چەند هێدفۆنێك، سپیكەر، مۆبایل و چەندین یوپی ئێس، تا دەگاتە كەرەستەی زۆر سادەییش وەك: فڵچەی ددانشتن و ئامێری ڕیشتاشینی كارمەندان".

"لە ڕێكخراوی تر، مەكینەی خەیاتی، مەكینەی ئۆڤەر و نەخش، ئوتوو، دڕێل، گسكی كارەبا، جزدان بە پارەوە و جانتاشیان بردوون"، میترۆ وا دەڵێت.

سەنتەری میترۆ بۆ داكۆكی لە مافی ڕۆژنامەنووسان، "هێرش بۆ سەر ئەو باڵەخانەیە و زەوتكردنی كەرەستەكانی و بردنی بۆ شوێنی نادیار"، بە "پێشێلكاریی ڕوونی یاسای مرۆیی نێودەوڵەتی و ڕێگری لە كاری ئەو ڕێكخراوانە" ناو دەبات، بەتایبەت كە وەكوو میترۆ دەڵێت "ئەو ڕێكخراوانە هیچ پەیوەندییەكیان بە ململانێی سیاسی و چەكداریی ئەم دواییە نییە".

سەنتەرەكە داوا دەكات، داوای لێبوردن لەو ڕێكخراوانە بكرێت و قەرەبووی زیانەكانیان بكرێتەوە. جەختیش دەكاتەوە كە "پێویستە هەموو لایەنەكان ئۆفیسی ڕێكخراوە ناوخۆیی و بیانییەكان بپارێزن".

سەنتەری میترۆ لە ئابی 2009 بە هەوڵی كۆمەڵێك ڕۆژنامەنووس و بەرگریكاری مافی مرۆڤ و بە هاوكاریی ڕێكخراوی پەیمانگای ڕۆژنامەنووسانی جەنگ و ئاشتی IWPR ـی ئەمریكی دامەزاروە. لەو كاتەوە 14 ڕاپۆرتی ساڵانەی دەربارەی ڕەوشی ئازادیی ڕۆژنامەگەری بڵاو كردووەتەوە.