شاندێکی وەزارەتی نەوتی ئێران لە بەغدادن؛ ئەمەریکا دەڵێت: ئێران نەوتەکەی بەناوی عێراقەوە دەفرۆشێت

پەرەگراف

شاندێکی باڵای وەزارەتی نەوتی ئێران لە بەغدادن و لەگەڵ وەزیری نەوتی عێراق کۆبوونەوە بۆ تاوتوێکردنی هاوکارییەکان نێوان هەردوو وڵات لە بواری نەوت، گاز و وزەدا، ئەوەش هاوکاتە لەگەڵ نوێترین سزای ئەمەریکا بۆ سەر تۆڕێکی قاچاخچێتیی کە نەوتی ئێران بەناوی عێراقەوە دەفرۆشن بۆ دەربازبوون لە سزاکانی ئەمەریکا.

شاندەکەی لایەنی ئێرانی جێگری وەزیری نەوت سەرۆکایەتی دەکات، بەپێی ڕاگەیەندراوی وەزارەتی نەوتی عێراق، هەردوو لا دەرفەتەکانی قووڵکردنەوەی هاوکاری دوو قۆڵییان لە چەندین کەرتی وزەدا تاوتوێ کردووەو جەختیان لەسەر گرنگی هەماهەنگی نێوان دوو وڵاتی دراوسێ کە پەیوەندی وزەی بەرفراوانیان هەیە، کردەوە.

سەردانی شاندەکەو گفتوگۆکان تەنها چەند ڕۆژێک دوای ئەوە دێت کە وەزارەتی خەزێنەی ئەمەریکا لە 2ی ئەیلوولدا کۆمەڵێک سزای نوێی ڕاگەیاند کە گروپەکانی قاچاخچێتی نەوتی ئێرانی کردە ئامانج، ئەوانەی کە پشت بە ڕێگاکانی عێراق دەبەستن بۆ دەربازبوون لە سزاکان و فرۆشتنی نەوتی ئێران بە ناوی عێراقەوە.

واشنتۆن هەوڵەکانی چڕ کردووەتەوە بۆ بلۆککردنی سەرچاوەکانی داهات کە چالاکییەکانی تاران پارەدار دەکەن، ئەوانەی کە ئەمریکا دەڵێت "ئاسایشی ناوچەکە تێکدەدەن".

سکۆت بیسێنت، وەزیری خەزێنەی ئەمەریکا، جەختی کردەوە کە "عێراق ناتوانێت ببێتە پەناگەیەکی ئارام بۆ تیرۆریستان،" و گوتی کە ئەو ڕێوشوێنانە ئامانجیان بەرەنگاربوونەوەی کاریگەری ئێرانە بە پچڕاندنی داهاتی نەوت کە بۆ دابینکردنی پارەی هێرشەکان دژی ئەمریکا و هاوپەیمانەکانی بەکاردەهێنرێت.

نوێترین سزا لە دژی وەلید خالید حەمید سامەڕائییە، هاوڵاتییەکی دووڕەگەزنامەیی عێراقی و سانت کیتس و نیڤیس کە لە ئیمارات نیشتەجێیە، تۆمەتبارە بە بەڕێوەبردنی تۆڕێکی ئاڵۆزی کۆمپانیاکانی گواستنەوە و بازرگانی. بەپێی نووسینگەی کۆنترۆڵی سەروەت و سامانی بیانی (OFAC)، تۆڕەکەی سامەڕائی بە نهێنی نەوتی ئێران لەگەڵ نەوتی خاوی عێراق تێکەڵ دەکات و وەک نەوتی عێراقی پاک دەیفرۆشێت، و بە نزیکەیی 300 ملیۆن دۆلار داهاتی نایاسایی ساڵانە بۆ ئێران بەدەست دەهێنێت.

ئەم ڕێوشوێنانە لەسەر بنەمای سزاکانی تەمموزی 2025 دامەزراون کە دژی تۆڕێکی تری قاچاخچێتی بە سەرۆکایەتی سەلیم ئەحمەد سەعید سەپێنران.

لە کاتێکدا بەغدا هەماهەنگی نزیکتر لەگەڵ تاران لەسەر پرسی وزە پەیڕەو دەکات، هەڵمەتی فشاری ئەمریکا پێگەی هەستیاری عێراق لە نێوان هاوپەیمانی لەگەڵ واشنتۆن و پەیوەندییە دێرینەکانی لەگەڵ ئێران نیشان دەدات.