پەرەگراف
سەرۆكوەزیرانی عێراق لەگەڵ سەرۆكی كۆمەڵی دادگەری تاوتوێی پەیوەندی و كێشەكانی نێوان هەرێم و بەغداد دەكەن. سوودانی جەخت دەكاتەوە كە ڕێگە نادات هاووڵاتیان "چ لە هەرێم یان پارێزگاكانی دیكە"ـی عێراق، باجی ناكۆكییەكان بدەن.
محەمەد شیاع سوودانی، سەرۆكوەزیرانی عێراق، لە نووسینگەی خۆی لە بەغداد پێشوازیی لە عەلی باپیر، سەرۆكی كۆمەڵی دادگەریی كوردستان كرد. نووسینگەی سوودانی دەڵێت، تاوتوێی دۆسیەكانی نێوان حكومەتی فیدراڵی و حكومەتی هەرێمی كوردستان و ڕێككەوتنەكانی پەیوەست بە شایستە داراییەكان و كاریگەریی پابەندبوون بە جێبەجێكردنیان لەسەر هاووڵاتییانی هەرێم، كراوە.
لە كۆبوونەوەكەدا سوودانی وتوویەتی "حكومەت لەسەر بنەمای بەرپرسیارێتیی خۆی بەرامبەر بە هاووڵاتییانی لە سەرانسەری عێراقدا، هەوڵی داوە چارەسەری دەستووری و یاسایی و یاسادانانی گونجاو بۆ پرسی شایستە داراییەكان و سووككردنی باری سەرشانی هاووڵاتییانی هەرێم بدۆزێتەوە".
سوودانی جەختیشی كردووەتەوە كە "ڕێگە نادات ناكۆكییەكان ببنە هۆكارێك بۆ ئەوەی هاووڵاتی باجێكی قورس بدات، چ لە هەرێم بێت یان لە پارێزگاكانی دیكە".
"عەلی باپیر سوپاس و پێزانینی خۆی بۆ ڕۆڵی سەرۆكی ئەنجوومەنی وەزیران لە دابینكردنی مافەكانی هاووڵاتییانی هەرێمی كوردستان و پەرۆشیی بۆ بەردەوامیدانی سەقامگیری و خۆشگوزەرانی لە سەرانسەری وڵاتدا دەربڕی"، نووسینگەی سەرۆكوەزیرانی عێراق وا دەڵێت.