پەرەگراف
ڕۆژی پێنجشەممە 28-08-2025، كامێراكانی تۆماركردنی تیژڕەوی لە دوو ڕێگای دیكە (سلێمانی - تاسڵووجە) و (سلێمانی - واماوا) دەكەونە كار، جۆرێكی تۆماركردنی سەرپێچی لە یەكەمیان وەن پۆینت (یەك خاڵ) دەبێت و لە دووەمیان كە ڕێگای دەرەوەیە پۆینت توو پۆینت (خاڵ بۆ خاڵ دەبێت).
دەقی ڕوونكردنەوە و ئاگاداریی بەڕێوەبەرایەتیی هاتووچۆی سلێمانی لەوبارەیەوە:
بەڕێوەبەرایەتی هاتووچۆی سلێمانی ئاگاداری شۆفێرانی بەڕێز دەكات كە لە ڕێكەوتی 28/8/2025 پێنج شەممە كاتژمێر 10 ی سەر لەبەیانی كامێراكانی ڕێگای نێوان سلێمانی – تاسڵووجە وە بە پێچەوانەوە (كامێراكانی تۆماركردنی تیژڕەوی) دەكەونە كار و تۆماركردنی سەرپێچی تیژڕەوی بە سیستەمی One Point و بەپێی ئەو خێراییانەی كە لە هێماكانی هاتووچۆی تەنیشت ڕێگاكە دانراون تۆمار دەكات.
سەبارەت بە ڕێگای نێوان سلێمانی – وارماوا بەهەمان شێوە كامێراكان دانراون لە ڕێكەوتی 28/8/2025 كاتژمێر 10 ی سەرلەبەیانی سزای سەرپێچی خێرایی تۆمار دەكەن بە سیستەمی Point to Point بەپێی ئەو خێراییانەی دیاریكراوە لە ڕێگەی هێماكانی هاتووچۆوە.
ماوەی لێبووردن لە كامێراكانی خێرایی (حدود التسامح) بۆ ئۆتۆمبێلی بچووك (٥) كیلۆمەترە وە بۆ بارهەڵگر (٣) كیلۆمەترە.
سەبارەت بە میكانیزمی تۆماركردنی سەرپێچی تیژڕەوی لەو كامێرایانەی بە سیستەمی Point to Point كار دەكەن، تێكڕای خێرایی لە هەموو كامێراكان هەژمار دەكرێت.
بۆ نموونە لە نێوان دوو كامێرا پێویستە شۆفێر بە خێرایی ڕیگەپێدراو كە دیاریكراوە شۆفێری بكات بە پێچەوانەوە سزای دیاریكراو دەدرێت.
هەروەها لەنێوان كامێراكانی دیكەدا ئەگەر شۆفێر لەسەر تیژڕەوی بەردەوام بوو هەمان سزا دووبارە دەیگرێتەوە.
میكانیزمی سەرپێچی تۆماركردنی تیژڕەوی لە كامێراكان بەپێی فەرمانی وەزارەتی ناوخۆ ڕێكخراوە، واتە سەرجەم بەڕێوەبەرایەتییەكانی هاتووچۆ لە هەرێـمی كوردستان بە یەك سیستەم كاردەكەن بێ جیاوازی لەو شەقام و ڕێگایانەی ناوەوە و دەرەوەی شارەكان لە هەرێم كە كامێراكانی تیژڕەوی تیادایە.