پەرەگراف
سەرۆكایەتیی داواكاری گشتیی هەرێمی كوردستان ڕایگەیاند، فەرمانگەی داواكاری گشتیی سلێمانی ڕادەسپێرن بۆ بەدواداچوونی ڕووداوەكەی ئوتێل لالەزار بەئامانجی "پاراستنی مافی هەمووان لە چوارچێوەی یاسا و دەستووردا". جەختیش دەكاتەوە كە "نابێت جێبەجێكردنی فەرمانەكانی دادگا ببێتە هۆی پشێوی و نائارامی".
سەرۆكایەتیی داواكاری گشتیی هەرێمی كوردستان لە بەیاننامەیەكدا دەڵێت "وەك ئاشكرایە لای هەموو لایەك كە یەك لە ئامانجە سەرەكییەكانی یاساكان بریتییە لە پاراستنی ماف و ئازادییەكان و ئاسایشی هاووڵاتیان، پێویستە هەموو كەسێك پابەندی یاسا بێت و كەس لە سەرووی یاساوە نەبێت".
سەرۆكایەتیی داواكاری گشتی لە درێژەی بەیاننامەكەد دەشڵێت "پاڵپشت بەو ئەركە یاساییەی كە دەزگای داواكاری گشتی هەیەتی لە پاراستنی سیستەمی هەرێم، چاودێریی ڕەوایی (مراقبە المشروعیە)، پاراستنی ســەروەریی یاسا و باش پیادەكردنی حوكمەكانی و چاودێریی جێبەجێكردنی بڕیارەكان بەپێی ماددە (١/یەكەم، چوارەم) لە یاسای داواكاری گشتیی هەمواركراو، جەخت دەكەینەوە كە لە كاتی جێبەجێكردنی هەر فەرمان و بڕیارێكی دادگا، دەسەڵاتی جێبەجێكردن پێویستە بەوپەڕی پەرۆشییەوە ڕەچاوی بنەما یاسایی و دەستوورییەكان بكات لە پاراستنی گیان و كەرامەتی هاووڵاتیان و پاراستنی سامانی گشتی و تایبەتی و مافەكانی خودی تۆمەتباریش".
سەرۆكایەتیی داواكاری گشتی جەخت دەكاتەوە كە "بۆ جێبەجێكردنی فەرمان و بڕیارەكانی دادگا، یاسا ڕێوشوێنی ئەوتۆی دیاری كردووە كە نەبێتە هۆكاری پشێوی و نائارامی و زیانگەیاندن بە سامانی گشتی و تایبەتیی هاووڵاتیان".
داواكاری گشتی پەیامێك ئاراستەی "دەزگاكانی ڕاگەیاندن و خاوەنی پەیج و هەژمارەكانی تۆڕە كۆمەڵایەتییەكان" دەكات كە "بەشێوەیەكی بەرپرسیارانە و دوور لە ئاڵۆزكردنی زیاتر، مامەڵە لەگەڵ ئەم ڕووداوە و لێكەوتەكانی بكەن".