پەرەگراف
ئەنجوومەنی وەزیرانی عێراق لە كۆبوونەوەی ئەمڕۆیدا بڕیاری دا بە خەرجكردنی مووچەی مانگی شەشی فەرمانبەرانی هەرێمی كوردستان، بەڵام بە مەرج.
بەپێی زانیارییەكانی پەرەگراف، مەرجەكان پەیوەستن بە ڕادەستكردنی داهاتی نانەوتی و هەناردەكردنەوەی نەوت و جێبەجێكردنی تەواوی ئەو لێكتێگەیشتنەی پێشتر هەردوولا لەسەری ڕێككەوتوون.
مەرجێكی سەرەكیی ئەنجوومەنی وەزیرانی عێراق، ڕازیكردن و پابەندكردنی كۆمپانیا نەوتییەكانە لەلایەن حكومەتی هەرێمەوە بە دەستپێكردنی هەناردەكردنەوەی نەوت لە ماوەی هەفتەیەكدا.
دەبێت كۆمپانیا بیانییەكانی نەوت لە هەرێمی كوردستان، ڕازی بن بە بەرهەمهێنانی یەك بەرمیل نەوت بە 16 دۆلار، كە لە یاسای هەمواركراوی بودجەدا هاتووە و هەمواری بڕگەی تێچووی دەرهێنانی نەوتیش بە ڕێككەوتنی هەرێم و بەغداد بووە.
مەرجێكی دیكەی بەغداد ڕادەستكردنی 120 ملیار دینارە وەكوو داهاتی نانەوتیی مانگی شەش، بەر لە ناردنی مووچەكە.
هەروەها دەبێت ئەو لیژنە هاوبەشانەی كە بەپێی لێكتێگەیشتنەكەی نێون هەردوو لا بۆ یەكلاكردنەوەی دۆسیەكانی مووچە، داهاتی نانەوتی، نەوت و تەوتین پێكهێنراون، بەزوویی كارەكانی خۆیان تەواو بكەن.
ناردنی مووچەی مانگی شەش پەیوەستە بە جێبەجێكردنی هەردوو مەرجی ڕادەستكردنی 120 ملیار دینار داهاتی نانەوتی و پابەندكردنی كۆمپانیا نەوتییەكان بە دەستپێكردنی هەناردەكردنەوەی نەوت لەلایەن حكومەتی هەرێمەوە.