پەرەگراف
ماوەی زیاتر لە 24 كاتژمێرە ئاگرێك لە سنووری گوند و شاخەكانی هەڵەبجە كەوتووەتەوە و تا ئێستا نەتوانراوە كۆنترۆڵ بكرێت. كەسێكی دیكە لە هەوڵی كوژاندنەوەی ئاگرەكەدا گیانی لەدەست دا و ژمارەی قوربانییەكان بوو بە دوو كەس.
كەمێك لەمەوبەر پۆلیسی دارستان و ژینگەی هەڵەبجە گیانلەدەستدانی كارمەندێكی لە ئاگرەكەی سنووری هەڵەبجە ڕاگەیاند و دەڵێت "كارمەندەكە ناوی (محەمەد شێخ سدیق)ـە و لە ئاگرەكەی گوندی مۆردین گیانی لەدەست داوە".
ئێوارەی دوێنێش ژینگەدۆستێك بە ناوی ئاری موختار لە كاتی هەوڵدان بۆ كوژاندنەوەی ئاگرەكەدا گیانی لەدەست دا.
جگە لە زیانە گیانییەكان، ئاگرەكە زیانی گەورەی بە ژینگەی ناوچەكە گەیاندووە، هەزاران دار و سەدان دۆنم پووش و پەڵاش و ڕەز و باخی ژمارەیەك گوند سووتاون.
بەهۆی بوونی پووش و پەڵاشی زۆر و هەڵكردنی با لە ناوچەكە، ئاگرەكە تەشەنەی سەندووە و ناوچەیەكی فراوانی گرتووەتەوە، پاش زیاتر لە 24 كاتژمێر نەتوانراوە كۆنترۆڵ بكرێت