پەرەگراف
جیاوازیی گەورە لە داهاتی سنووری سلێمانی بەر لە ڕێككەوتن لەگەڵ بەغدا و دوای ڕێككەوتن لەگەڵ بەغدا دروست دەبێت. داهاتی هەفتەی دوای ڕێككەوتنەكە پێنج هێندەی داهاتی هەفتەی بەر لە ڕێككەوتنەكەیە. ئەمە جگە لە ڕوودانی گۆڕانكاری لە بڕی داهاتی هەفتەكانی پێشوو دوای بڵاوكردنەوەیان.
بەپێی داتاكانی ماڵپەڕی شەفافیەت، داهاتی ئەم هەفتەیەی سنووری سلێمانی بەراورد بە هەفتەی ڕابردوو، بە ڕێژەی لەسەدا 411 بەرز بووەتەوە، بەڵام 80 ملیاری مەقاسەیە و تەنیا حەوت ملیاری نەختینەیە. ئەم بەرزبوونەوە هاوكاتە لەگەڵ ڕێككەوتنی نێوان هەرێم و بەغدا كە بەپێی ڕێككەوتنەكە دەبێت هەرێم زیاتر لە دوو هێندەی جاران داهاتی نانەوتی ڕادەستی حكومەتی فیدراڵی بكات.
بەپێی داتاكانی ماڵپەڕی شەفافیەت كە فەرمییە، داهاتی پارێزگاكانی سلێمانی و هەڵەبجە و ئیدارەكانی گەرمیان و ڕاپەڕین لە 12 بۆ 18ـی ئەم مانگە، 17 ملیار و 52 ملیۆن دینار بووە، بەڵام لە هەفتەی 19 بۆ 25ـی مانگدا، داهاتەكە بۆ 87 ملیار و 229 ملیۆن دینار بەرز بووەتەوە.
ڕوون نییە ئەو داهاتە بەهۆی چییەوە بەو ڕێژە گەورە بەرز بووەتەوە، بەوپێیەی ماڵپەڕەكە هیچ وردەكارییەك لەبارەی داهاتەكانەوە ئاشكرا ناكات و نازانرێت هەر بەڕێوەبەرایەتییەك داهاتەكەی چەندە.
جگە لە بەرزبوونەوەی گەورەی داهاتی ئەم هەفتەیە، ماڵپەڕی شەفافیەت گۆڕانكاریی لە داهاتی هەفتەی ڕابردوویشدا كردووە و بۆ دوو هێندە زیادی كردووە. لە 18ـی تەمووزدا ماڵپەڕەكە بڵاوی كردەوە كە داهاتی ئەو فتەیەی تێپەڕیوە (12 بۆ 18ـی تەمووز)، نۆ ملیار و 124 ملیۆن دینار بووە، بەڵام ئێستا ئەو ژمارەیەی بۆ 17 ملیار و 52 ملیۆن دینار بەرز كردووەتەوە.
لە داهاتی هەفتەی دووەمیشدا (5 بۆ 11ـی تەمووز) گۆڕانكاری ڕووی داوە، سەرەتا ماڵپەڕەكە داهاتی ئەو هەفتەیەی بە (شەش ملیار 743 ملیۆن دینار) بڵاو كردەوە، بەڵام دواتر بۆ (حەوت ملیار و 831 ملیۆن دینار) گۆڕاوە.
بەپێی داتاكانی ماڵپەڕەكە، داهاتی هەفتەی كۆتایی مانگی پێشوو و سەرەتای ئەم مانگە (28ـی حوزەیران بۆ 4ـی تەمووز)، شەش ملیار 743 ملیۆن دینار بووە.
بەپێی ڕێككەوتنی نێوان هەرێم و بەغدا، حكومەتی هەرێم ڕۆژی 22ـی ئەم مانگە 120 ملیار دیناری وەكوو داهاتی نانەوتی ڕادەستی عێراق كرد، مانگەكانی پێشتر هەرێم دەوروبەری 50 ملیار دیناری بۆ بەغدا دەنارد.