پەرەگراف
ئەمریكا سەركۆنەی هێرشە درۆنییەكانی سەر كێڵگە نەوتییەكانی هەرێم دەكات و دەڵێت "قبووڵكراو نین".
كونسوڵخانەی ئەمریكا لە هەولێر، لە هەژماری فەرمیی خۆی لە فەیسبووك دەڵێت "ویلایەتە یەكگرتووەكانی ئەمریكا سەركۆنەی ئەو ھێرشە درۆنییانەی ئەم دواییە دەكات لە سەرانسەری وێراقدا، بە ھەردوو ھێرشی درۆنی ١٤ و ١٥ مانگی تەموزیشەوە بۆ سەر ژێرخانی گرنگی كێڵگە نەوتییەكانی خورمۆڵە و سەرسەنگ لە ھەرێمی كوردستانی عێراقدا".
كونسوڵخانەی ئەمریكا جەخت دەكاتەوە "پێویستە حكومەتی عێراق پیادەی دەسەڵاتی خۆی بكات بۆ ڕێگریكردن لە لایەنە چەكدارەكان لە ئەنجامدانی ئەو ھێرشانە بۆ سەر ئەو شوێنانە لە ناوخۆی وڵاتدا، بەو شوێنانەشەوە كە كۆمپانیا عێراقی و نێودەوڵەتییەكان وەبەرھێنانیان لە داھاتوی عێراقدا كردووە".
ئەمریكا ڕایشیدەگەیەنێت كە "ئەو هێرشانە قبووڵكراو نین و ھەڕەشەن بۆ سەر سەروەریی عێراق و تەگەرە دەخەنە بەردەم ھەوڵەكانی عێراق بۆ سەرنجڕاكێشانی وەبەرھێنانی دەرەكی".
"ھانی حكومەتی عێراق دەدەین لێكۆڵینەوە بكات، تا بزانێت كێ لە پەنای ھێرشەكانەوەیە و ڕووبەڕووی بەرپرسیارێتیان بكاتەوە"، ئەمریكا وا دەڵێت.
بەیاننامەی ئەمریكا پاش ئەوە هات كە بەیانیی ئەمڕۆ هێرش كرایە سەر كێڵگەی نەوتی سەرسەنگ لە پارێزگای دهۆك، شەوی ڕابردوویش هێرش كرایە سەر كێڵگەی نەوتی خورمەڵە لە پارێزگای هەولێر.
كۆمپانیاHKN ـی ئەمریكی كە وەبەرهێنان لە كێڵگەی نەوتی سەرسەنگدا دەكات، بەیانیی ئەمڕۆ لە بەیاننامەیەكدا ڕوودانی تەقینەوە و ڕاگرتنی بەرهەمهێنانی لە كێڵگە نەوتییەكە پشتڕاست كردەوە. كۆمپانیاكە ڕایگەیاندووە "ئەندامانی ستافی كێڵگەكە سەلامەتن و تیمی فریاگوزاری سەرقاڵی كوژاندنەوەی ئاگری تەقینەوەكەیە".
دواتر وەزارەتی سامانە سروشتییەكان ڕایگەیاند كە هێرشەكە بە "درۆنی بۆمبڕێژكراو" ئەنجام دراوە و بە "تیرۆرستی"یش ناوی دەبات، هەروەها جەخت دەكاتەوە كە "هیچ زیانێكی گیانیی نەبووە".
وەزارەتی سامانە سروشتییەكان دەشڵێت "ئەم جۆرە هێرشانە بۆ سەر ژێرخانی ئابووریی هەرێمی كوردستان بەتووندی ئیدانە و شەرمەزار دەكەین".
شەوی ڕابردوو وەزارەتی سامانە سروشتییەكانی هەرێم ڕایگەیاند "ئێوارەی ڕۆژی دووشەممە (14)ـی تەمووزی 2025، لە كاتژمێر 8:20 و 8:25، لە ڕێگەی دوو درۆنی بۆمبڕێژكراوەوە هێرش كرایە سەر كێڵگەی نەوتی خۆرمەڵە لە پارێزگای هەولێر".
وەزارەتی سامانە سروشتییەكان دەشڵێت "هێرشەكە هیچ زیانێكی گیانیی نەبووە، تەنیا زیانی بە بۆرییەكانی ئاوی وێستگەكە گەیاندووە".