پەرەگراف
مەسروور بارزانی جەخت دەكاتەوە كە "كێشەی ئێمە (هەرێم) لەگەڵ حكومەتی فیدراڵی، سیاسییە نەك تەكنیكی". دەشڵێت "شاندی حكومەتی هەرێمی كوردستان ئێستا لە بەغدایە بۆ ئەوەی لە نزیكترین كاتدا كێشەی مووچەبڕینی خەڵكی كوردستان چارەسەر بكرێت".
ئەم قسانەی مەسروور بارزانی لە كۆبوونەوەیەكدا هات لەگەڵ ژمارەیەك لە كادیرانی پارتی، كە تێیدا وتیشی "عێراق وڵاتێكی فیدراڵییە و هەرێمی كوردستانیش قەوارەیەكی دەستووریی هەیە، دەبێ ڕێز لە دەسەڵات و مافە دەستوورییەكانی هەرێمی كوردستان بگیرێت".
هەروەها دووپاتی كردەوە كە "هەرێمی كوردستان هەرگیز دەستبەرداری هیچ مافێكی دەستووریی خۆی نابێت".
مەسروور بارزانی وەكوو جێگری دووەمی سەرۆكی پارتی دەڵێت "پارتی بە ڕێبەرایەتی جەنابی سەرۆك بارزانی، داكۆكیكار و پارێزەری یەكەم و سەرەكی ماف و داخوازییەكانی خەڵكی كوردستان و قەوارەی هەرێمی كوردستان و گەرەنتیی پاراستنی هەرێمە، بۆیە بەهێزبوونی پارتی، بەهێزبوونی كوردستانە".
بەیانیی ئەمڕۆ شاندێكی حكومەتی هەرێمی كوردستان بە سەرۆكایەتیی وەزیری سامانە سروشتییەكان گەیشتە بەغداد. بڕیارە گفتوگۆی چڕ دەربارەی ڕەشنووسی پێشنیازێكی حكومەتی فیدراڵی بۆ چارەسەری كێشەكان بكرێت. چاوەڕێ دەكرێت بەزوویی هەردوولا بگەنە ڕێككەوتن.
شاندی هەرێم پێكهاتووە لە كەمال محەمەد، وەزیری سامانە سرووشتییەكان بە وەكالەت، ئامانج ڕەحیم، سكرتێری ئەنجوومەنی وەزیران و عەبدولحەكیم خەسرۆ، بەرپرسی فەرمانگەی هەماهەنگی و بەدواداچوونی حكومەتی هەرێم.
بابەتی سەرەكیی گفتوگۆ و ڕێككەوتنی ئەمجارە هەناردەكردنەوەی نەوتی هەرێمە، كە دەبێت ڕێككەوتنی ورد لەسەر بڕی نەوتەكە و شێوازی ڕادەستكردن و پێدانی پارەی كۆمپانیاكان بكرێت.