لیژنەی ئەمنیی پارێزگای سلێمانی بۆ مامۆستایان و فەرمانبەران: خۆپیشاندان بۆ كاتێكی سەقامگیرتر دوابخەن
پەرەگراف
لیژنەی ئەمنیی پارێزگای سلێمانی داوا لە مامۆستایان و فەرمانبەرانی ناڕازی دەكات خۆپیشاندانە بڕیارلێدراوەكەی ڕۆژی پێنجشەممە بۆ "كاتێكی سەقامگیرتر" دوابخەن و دەڵێت "ئەنجامدانی خۆپیشاندان و ناڕەزایەتی لەم دۆخە هەستیارەی ناوچەكەی پێدا تێپەڕ دەبێت، گونجاو نابێت".
لیژنەكە لە بەیاننامەیەكدا دەڵێت "پشتیوانی و پاڵپشتیی تەواوی خۆمان، بۆ ماف و داوا ڕەواكانی مامۆستایان و فەرمانبەران و مووچەخۆران بەگشتی؛ دەردەبڕین و باری دژواری ژیان و گوزەرانی مووچەخۆران بەهۆی دواكەوتنی دابەشكردنی مووچەوە، لەبەرچاو دەگرین. لەگەڵ ئەوەشدا؛ بە هەموو لایەكی ڕادەگەیەنین كە دەنگی مووچەخۆران و ناڕەزایەتییەكانیان گەیشتووەتە هەموو دەسەڵاتەكانی هەرێمی كوردستان و عێراقی فیدراڵ".
لیژنەی ئەمنیی پارێزگای سلێمانی دەشڵێت "وەك چۆن پێشتر هاوكار و هەماهەنگ بووین لە پرسی پاراستن و هێنانەكایەی ژینگەیەكی گونجاو بۆ خۆپیشاندان و سەلامەتیی گیانی خۆپیشاندەران، ئەمجارە بە سوپاس و پێزانینەوە، داوا دەكەین خۆپیشاندانەكە بۆ كاتێكی سەقامگیرتر دوابخەن، تا هاوكار و هەماهەنگ بین لە گەیاندنی پەیامەكانیان بەشێوەیەكی شارستانییانە و دوور لە هەر ئەگەرێكی توندوتیژی و ڕووداوی نەخوازراو".
نوێ دەكرێتەوە...