پەرەگراف
سەرۆكایەتیی هەرێمی كوردستان "سەركۆنە"ـی هێرشەكەی ئیسرائیل بۆ سەر ئێران دەكات و بە "هەڕەشە لەسەر ئاسایش و سەقامگیریی ناوچەیی و نێودەوڵەتی" ناوی دەبات. بە ئەركی كۆمەڵگەی نێودەوڵەتیشی دەزانێت كە "كاردانەوەی خێرا و بەپەلەی هەبێت و تا زووترە ڕێ لە تەشەنەسەندنی زیاتری دۆخەكە بگیرێت".
دەقی ڕاگەیەندراوی سەرۆكایەتیی هەرێمی كوردستان:
سەركۆنەی هێرشەكەی ئیسرائیل بۆ سەر كۆماری ئیسلامیی ئێران و بەكارهێنانی هێزی سەربازی لە یەكلاكردنەوەی ناكۆكییەكاندا دەكەین. ئەم پێشهاتانە ئارامی و سەقامگیریی ناوچەكە ئاڵۆزتر دەكەن و دەبنە هەڕەشە لە سەر ئاسایش و سەقامگیریی ناوچەیی و نێودەوڵەتی.
ڕووبەڕووبوونەوە و ڕێكاری سەربازی، ڕەوشەكە خراپتر دەكات. لەم كاتە هەستیارەدا، ئەركی كۆمەڵگەی نێودەوڵەتییە كە كاردانەوەی خێرا و بەپەلەی هەبێت و كار بۆ ئەوە بكات ئاڵۆزی و پشێوییەكان لەوە زیاتر پەرە نەستێنن و تا زووترە ڕێ لە تەشەنەسەندنی زیاتری دۆخەكە بگیرێت.