پەرەگراف
وەزیری ناوخۆی هەرێمی كوردستان هۆشداری دەدات كە "بەكارهێنانی ماددە هۆشبەرەكان بە شێوەیەكی ترسناك زیادی كردووە". دەشڵێت "لە ئێران و سووریاوە بەلێشاو ماددەی هۆشبەر دێت و عێراق بووە بە ناوچەیەك بۆ ساغكردنەوەی ئەو ماددانە".
لە وتاری بەشداری لە هەڵمەتی نیشتمانیی ڕووبەڕووبوونەوەی ماددە هۆشبەرەكان، ڕێبەر ئەحمەد، وەزیری ناوخۆی حكومەتی هەرێم، ئەو ماددانەی بە "ئاڵنگارییەكی جیددی كە كاریگەرییان لە تیرۆر كەمتر نییە" ناو برد و وتی "بەهۆی هەڵكەوتەی جوگرافییەوە كە هەرێمی كوردستان كەوتووەتە ناوەڕاستی وڵاتانی بەرهەمهێنانی ماددە هۆشبەرەكان و ڕێگاكانی گواستنەوە، بۆیە بەركەوتەی ڕاستەوخۆی ماددە هۆشبەرەكانە".
ڕێبەر ئەحمەد تیشكی خستە سەر ئەوەی "لەم ساڵانەی دواییدا لە سەرتاسەری جیهان بەتایبەتی لەناو گەنجان و هەرزەكاراندا، ڕێژەی بەكارهێنانی ماددە هۆشبەرەكان بە شێوەیەكی ترسناك زیادی كردووە و بازاڕی ئەم ماددانە بووەتە هۆی گەشەسەندنی دارایی بۆ دەستە تاوانكارییەكان، ئەمەش گرفتەكەی چەند بەرانبەر كردووە".
بەپێی ڕاپۆرتی ڕێكخراوی (UNODC)، نزیكەی 275 ملیۆن كەس لە ساڵی 2022 لە ناوچە جۆراوجۆرەكانی جیهاندا ماددە هۆشبەرەكانیان بەكار هێناوە. ڕێكخراوی تەندروستیی جیهانییش لە ڕاپۆرتی خۆیدا بڵاوی كردووەتەوە كە ساڵانە نزیكەی 500 هەزار كەس بەهۆی بەكارهێنانی ماددەی هۆشبەرەوە گیان لەدەست دەدەن و بە دەیان هەزار كەسی تریش تووشی نەخۆشی و گیروگرفتی دەروونی و جەستەیی دەبن.
وەزیری ناوخۆی هەرێمی كوردستان، "ڕەوشی ناوچەكە و ناسەقامگیریی سیاسی و ئابووری و سەربازی"، بە هۆكاری زیاتر بڵاوبوونەوەی ماددەی هۆشبەر لە عێراق و هەرێمی كوردستان ناو برد.
وەزیری ناوخۆ لە وتارەكەیدا ئاماژەی بەوەش كرد، حكومەتی هەرێم "لە چوارچێوەی پلانێكی ستراتیژی و بەرنامەی تۆكمە، كاری جیددی لەسەر نەهێشتن و وشكردنی سەرچاوەكانی ماددە هۆشبەرەكانی كردووە". لەو چوارچێوەیەشدا هەماهەنگی و ئۆپەراسیۆنی هاوبەشیان لەگەڵ حكومەتی فیدراڵ و كۆمەڵگەی نێودەوڵەتیش هەبووە.
لەسەر ئاستی ناوخۆی هەرێمیش، دەزگا ئەمنی و پەیوەندیدارەكانی دیكەی حكومەتی هەرێم، لە ڕێگەری "ئۆپەراسیۆنەكانی دەستگیركردنی بازرگان و ئەو كەسانەی دەیگوازنەوە، هەروەها چاودێریكردنی سنوورەكان، كافتریا، دەرمانخانە، كۆمپانیاكانی گواستنەوە و سەرجەم شوێنە گشتییەكان" ڕووبەڕووی ماددە هۆشبەرەكان بووەتەوە.