پەرەگراف
بەپێی زانیاریی سەرچاوەیەكی ئاگادار، بە ئەگەری بەهێزەوە مووچەی مانگی پێنج لە كاتی خۆیدا و بەر لە جەژنی قوربان دابەش ناكرێت، لەبەر ئەوەی وەزارەتی دارایی هەرێم داوای كردووە مووچەكە پاكتاو بكرێت و بكرێت بە ئەمانات لە ئەستۆی حكومەتدا. سەرچاوەكە دەڵێت "وەزارەت كاتێك ئەم بڕیارە دەدات كە بزانێت تا ناوەڕاستی مانگی داهاتوو و یان زیاتر ناتوانێت مووچە دابەش بکات".
ئەمڕۆ 27-05-2025، سەرچاوەیەكی ئاگادار و پەیوەندیدار بە پەرەگرافی ڕاگەیاند "بەڕێوەبەرایەتیی گەنجینەكان، وەزارەتەكان و بەڕێوەبەرایەتییەكانی ئاگادار كردووەتەوە كە مووچەی مانگی پێنج پاكتاو بكەن و بە مۆڵەتنامەی یەكلاییكردنەوە بكرێت بە ئەمانات لە ئەستۆی حكومەتدا".
ئەو سەرچاوەیە وتیشی "ئەم بڕیارە بە مانای ئەوە دێت كە مووچەی مانگی پێنج لە كاتی خۆیدا دابەش ناكرێت و دەكەوێتە دوای جەژن، بۆیە وەكوو ڕێكارێكی ئیداری دەبێت بە نووسراو بكرێت بە ئەمانات تا ئەو كاتەی مووچە ئامادە دەبێت بۆ دابەشكردن".
سەرچاوەكەی پەرەگراف هۆكاری ئەم بڕیارەی وەزارەتی دارایی بۆ دوو خاڵ گەڕاندەوە "یەكەم: هێشتا خەرجكردن و دابەشكردنی مووچە لە عێراق كۆتایی نەهاتووە و جارێ مووچەی هەرێم خەرج ناكرێت. دووەم: لیستی مووچەی مانگی پێنجی هەرێم كەمێك درەنگ ڕادەستی وەزارەتی دارایی عێراق كرا، بۆیە پێناچێت بەر لە جەژن وردبینیكردنی كۆتایی بێت".
ڕۆژی ٢٥ـی ئایاری ٢٠٢٥، لیستی مووچەی مانگی ئایاری فەرمانبەران و مووچەخۆرانی هەرێمی کوردستان. لەلایەن تیمی تەکنیکی وەزارەتی دارایی هەرێمەوە ڕادەستی فەرمانگەی ژمێریاریی وەزارەتی دارایی حکومەتی فیدراڵ کرا.
وەكوو ئەو سەرچاوەیە ئاماژەی پێ دا، ئەو كێشە نوێیانەیش كە بەهۆی گرێبەستی حكومەتی هەرێم و كۆمپانیا ئەمریكییەكان لەنێوان هەرێم و بەغدا هاتووەتە ئاراوە، ئەگەری زۆرە كاریگەریی لەسەر مووچەیش هەبێت.
"ناردنی مووچە پەیوەندیی بە ویستی بەغداوە هەیە، ئەگەر بیانەوێت بەر لە جەژن دەینێرن، بەڵام ڕەنگە وەزارەتی دارایی هەرێم دڵنیا بێت لەوەی كە بەغدا بەمزووانە مووچەی مانگی پێنج نانێرێت، بۆیە دەیكات بە ئەمانات"، سەرچاوەكەی پەرەگراف وای وت.