پەرەگراف
وەزارەتی دارایی هەرێم ڕایگەیاند، لە ئەنجامی ئەو ڕێكارانەی لە دوو مانگی ڕابردوو گیرانەبەر، توانراوە بۆ لیستی مووچەی مانگی ئایار، پێنج هەزار و 261 خانەنشینی نوێ داخڵی لیستی مووچە بكرێنەوە. ناوی ئەو خانەنشینانە ڕەوانەی وەزارەتی دارایی عێراق كراوە تا "لەگەڵ مووچەی مانگی ئایار، مووچەی مانگەكانی ڕابردووشیان بۆ خەرج بكرێتەوە".
سستی لە بەڕێوەچوونی مامەڵەی خانەنشینی لە هەرێمی كوردستان، وای كردووە هەزاران فەرمانبەر كە ئەمساڵ خانەنشین كراون، هیچ مووچەیەك وەرنەگرن، ئەوەش ناڕەزایەتیی بەدوادا هاتووە.
وەزارەتی دارایی هەرێم دەڵێت "چەندین ڕێكار و هەنگاوی پێویست بۆ خێرا ڕاییكردنی مامەڵەی خانەنشینان گیراونەتە بەر، لە چوارچێوەی ئەوەشدا داوا لە سەرجەم وەزارەت و فەرمانگەكانی نەبەستراو بە وەزارەت كراوە، كە لەسەر بنەمای فۆڕمی زانیاریی بەڕێوەبەرایەتیی گشتیی خانەنشین، دۆسیەی ئەو فەرمانبەرانە ڕەوانە بكەن كە تەمەنی یاساییان لە خزمەت تەواو بووە و بەپێی یاسای خانەنشینی یەكگرتوی عێراق ڕەوانەی خانەنشینی دەكرێن".
وەزیری دارایی هەرێم لە نووسراوێكدا داوای كردووە كە دۆسیەی خانەنشینان بەبێ كەموكووڕی ڕەوانەی بەڕێوەبەرایەتیی خانەنشینی بكرێت، بۆ ئەوەی مامەڵەكانیان بەبێ گرفت تێپەڕێت و دوانەكەوێت، بە پێچەوانەوەشەوە وەزارەت و فەرمانگەی پەیوەندیدار بەرپرسیار دەبن.
