پەرەگراف
كۆمیسیۆنی هەڵبژاردنەكانی عێراق ماوەی تۆماركردنی ناوی هاوپەیمانی و حزب و لیستە تاكەكەسییەكانی بۆ بەشداریكردن لە هەڵبژاردن درێژ كردەوە.
جومانە غەلای، وتەبێژی كۆمیسیۆنی باڵای سەربەخۆی هەڵبژاردنەكانی عێراق بە پەرەگرافی ڕاگەیاند "ماوەكە شەش ڕۆژی دیكە درێژ كراوەتەوە و تۆماركردن تا كۆتایی دەوامی فەرمیی ڕۆژی 20ـی ئەم مانگە بەردەوام دەبێت".
وتەبێژی كۆمسیۆن دەڵێت "تا ئێستا 335 حزب كە مۆڵەتیان پێ دراوە و 66 هاوپەیمانی، لای كۆمسیۆن خۆیان بۆ بەشداری لە هەڵبژاردن تۆمار كردووە".
هەڵبژاردنی خولی شەشەمی پەرلەمانی عێراق بڕیارە لە 11-11-2025 بەڕێوە بچێت. حكومەت و كۆمیسیۆن و سەرجەم لایەنە عێراقییەكان جەخت لە بەڕێوەچوونی لە وادەی خۆیدا دەكەنەوە.
كۆمسیۆن لە ڕۆژی 15ـ-04-2025 دەرگای تۆماركردنی ناوی حیزب و هاوپەیمانێتی و لیستە تاكەكەسییەكانی بۆ هەڵبژاردنی پەرلەمانی عێراق بۆ ماوەی 20 ڕۆژ كردەوە، دواتر وادەكەی لە 4ـی ئایار بۆ 14ـی ئایار درێژ كردەوە، ئەمڕۆش بۆ دووەم جار وادەكەی تا 20ـی مانگ درێژ كردەوە كە پێدەچێت ئەمە كۆتا درێژكردنەوە بێت.
پێشتریش كۆمیسیۆنی هەڵبژاردنەكانی عێراق ماوەی نوێكردنەوەی تۆماری بایۆمەتریی دەنگدەرانی بۆ یەك مانگی دیكە درێژ كردەوە. نوێكردنەوەی تۆماری دەنگدەران تا 25-05-2025 بەردەوام دەبێت.