جووتیارەكەی سەرگەڕان لەسەر بنەمای ڕاپۆرتێك كە دوو ئەفسەری 'پارتی و یەكێتی'ـش واژوویان كردووە دادگایی دەكرێت
پەرەگراف
لەسەر بنەمای ڕاپۆرتی لیژنەیەك كە دوو ئەفسەری كورد "لە پشكی پارتی و یەكێتی"ـش واژوویان لەسەر كردووە، سكاڵا لەسەر جووتیارە كوردەكەی سەرگەڕان تۆمار كراوە و تۆمەتبار كراوە بە "ئاژاوەگێڕی". پارێزەری دۆسیەكە بە ڕاپۆرتێكی "زۆر خراپ" وەسفی دەكات و نوێنەری جووتیارانی كوردیش لە سەرگەڕان دەڵێت "ئەو دوو ئەفسەرە كوردە ئەگەر فەسڵیش بكرانایە، نەدەبوو واژوو لەسەر ڕاپۆرتەكە بكەن".
ئەمڕۆ دووشەممە 05-05-2025، محەمەد ئەمین، ئەو جووتیارە كوردەی كە لە گوندی سەرگەڕانی كەركووك لەلایەن سوپای عێراقەوە بە ملپێچەكەی ڕاكێشرا، لەسەر سكاڵایەكی وەزارەتی بەرگریی عێراق چووە دادگای دبس و بە كەفالەتی سێ ملیۆن دینار ئازاد كرا.
سەبارەت بە سكاڵاكە، محەمەد ئەمین وتی "سكاڵاكە لەسەر بنەمای ئەو ڕاپۆرتە تۆمار كراوە كە ڕۆژی 18-12-2024 لیژنەیەكی چوار كەسیی سەربازی لە سەرۆكایەتیی ئەنجومەنی وەیرانی عێراقەوە هاتنە ناوچەی شناغە بۆ لێكۆڵینەوە لە ڕووداوی ڕاكێشانی ملپێچەكە كە لە 17ـی مانگ بەرامبەر من كرا".
ئەو جووتیارە وتیشی "لیژنەكە كە دوو ئەندامیان كوردن، لە ڕاپۆرتەكەدا زۆر خراپ لەسەر منیان نووسیوە، وەكوو ئەوەی من هۆكاری ئاژاوە بم و ئاژاوەگێڕیم كردبێت، هەروەها زۆر خراپیش لەسەر ناوچەكە و پەرلەمانتارە كوردەكان نووسیویانە".
محەمەد ئەمین داوا لە سەرۆك و جێگری سەرۆكی حكومەتی هەرێم و وەزیری پێشمەرگە دەكات "لیژنەیەكی لێكۆڵینەوە" لەسەر ئەو ڕاپۆرتە پێك بهێنرێت و دەڵێت "چۆن نوێنەرێكی كورد قسەی خراپی لەو شێوەیە واژوو دەكات".
بەشدار حەسەن، پارێزەری دۆسیەی جووتیارە كوردەكە، جەختی لەوە كردەوە كە ئەو ڕاپۆرتە لەلایەن ژمارەیەك ئەفسەری بەرگریی عێراق و هەرێمی كوردستانەوە ئامادە كراوە و وتیشی "نەدەبوو ئەفسەرە كوردەكان واژوو لەسەر ئەو ڕاپۆرتە بكەن".
"ڕاپۆرتەكە زۆر خراپە، تێیدا هاتووە كە دەبێت محەمەد ئەمین دادگایی بكرێت"، پارێزەرەكە وا دەڵێت.
محەمەد ئیسماعیل، نوێنەری جووتیارانی كورد لە سەرگەڕان، ڕایدەگەیەنێت "ئەو دوو ئەفسەرە كوردەی واژوویان لەسەر ڕاپۆرتەكە كردووە، نوێنەری پارتی و یەكێتین".
نوێنەری جووتیارانی كورد لە سەرگەڕان دەشڵێت "ئەو دوو فەسەرە كوردە ئەگەر فەسڵیش بكرانایە، نەدەبوو واژوو لەسەر ڕاپۆرتەكە بكەن، چونكە ناهەقیی تێدایە".