سەنتەری میترۆ: لە ڕێگەی ژیریی دەستكردەوە زانیاریی ناڕاست لە میدیاكانی هەرێم بڵاو كراوەتەوە
پەرەگراف
سەنتەری میترۆ بۆ داكۆكی لە ڕۆژنامەنووسان لە ڕۆژی جیهانیی ئازادیی ڕۆژنامەگەریدا دەڵێت "لە كاتێكدا ئەم یادە دەكەینەوە كە هێشتا زیندانەكانمان ڕۆژنامەنووسی تێدایە و كەیسەكانی ئازادیی كاری ڕۆژنامەنووسی وەكوو پێویست لە دادگاكان بە یاسای كاری ڕۆژنامەوانی مامەڵەیان لەگەڵدا ناكرێت".
لە چالاكییەكدا كە سەنتەرەكە بۆ یادكردنەوەی ڕۆژی جیهانیی ئازادیی ڕۆژنامەگەری ڕێكی خستبوو، دیاری محەمەد، بەرپرسی سەنتەری میترۆ وتی "ڕێكخراوی یونسكۆ ئەمساڵ لەژێر ناونیشانی (مەترسییەكانی ژیریی دەستكرد) ئەم یادە دەكاتەوە".
دیاری محەمەد وتیشی "لە ماوەی ڕابردوودا تێبینیمان كردووە لە هەرێمی كوردستانیش لە ڕێگەی ژیریی دەستكردەوە چەندین هەواڵ و زانیاریی ناڕاست و ناتەندروست دراوە بە بینەران. هۆشداری دەدەین بە ڕۆژنامەنووس و میدیاكانمان كە بە وریاییەوە مامەڵە لەگەڵ ئەم ئامرازەی پێشكەوتن بكەن كە هاتووەتە ئاراوە".