وەزارەتی دارایی ٤٥ ملیار دینار بۆ پرۆژەكانی سلێمانی و هەڵەبجە و گەرمیان و ڕاپەڕین خەرج دەكات
پەرەگراف
وەزارەتی دارایی هەرێم ٤٥ ملیار دینار بۆ پرۆژەكانی هەردوو پارێزگای سلێمانی و هەڵەبجە و ئیدارەكانی گەرمیان و ڕاپەڕین خەرج دەكات. بڕیارەكە دوای كۆبوونەوەكانی چەند ڕۆژی ڕابردووی وەزیری درایی دێت لەگەڵ بەرپرسانی ئیداری و یەكێتیی بەڵێندەران و بانكەكانی سەر بەوەزارەت.
ئاوات شێخ جەناب، وەزیری دارایی هەرێم، چەند بڕیارێكی لە بەرژەوەندیی بەڵێندەران و ئەو كۆمپانیایانە دەركردووە كە سەرقاڵی ئەنجامدانی پڕۆژەكانن لەو ناوچانە.
بەپێی بڕیارەكان، پارە بۆ دەرمان و پێداویستیی تەندروستیی سلێمانی و نەخۆشخانەی هیوا، شەقامی ١٠٠ مەتریی سلێمانی، ڕێگای دووسایدی كەلار - دەربەندیخان، شایستەی كۆمپانیاكانی خۆڵ و خاشاك، پڕۆژە بەردەوامەكانی پارێزگاكانی سلێمانی و هەڵەبجە و ئیدارەكانی گەرمیان و ڕاپەڕین خەرج كراوە.
هەروەها وەزیری دارایی و ئابووریی هەرێم بڕیاری دا بە بەردەوامبوونی لیژنەی خەرجكردنی گەڕانەوەی (التأمينات و خطاب الضمان)ـی بەڵێندەران لە سەرجەم بانكەكان، بەمەبەستی گەڕانەوەی پابەندییەكان بەپێی ڕێژە و گوژمەی دیاریكراو.
ئەو بڕە پارانەی كە بڕیاری خەرجكردنیان دراوە:
١- ٤،٥٠٠،٠٠٠،٠٠٠ چوار ملیار و پێنجسەد ملیۆن دینار بۆ خەرجی دەرمان بۆ بەڕێوبەرایەتی گشتی تەندروستی سلێمانی.
٢- ٤،٠٠٠،٠٠٠،٠٠٠ چوار ملیار دینار بۆ خەرجی دەرمان بۆ نەخۆشخانەی هیوا.
٣- ٣،٥٠٠،٠٠٠،٠٠٠ سێ ملیار و پێنجسەد ملیۆن دینار ، بۆ سەرجەم پڕۆژەكانی سلێمانی و دەوروبەری.
٤-٣،٠٠٠،٠٠٠،٠٠٠ سێ ملیار دینار بۆ سەرجەم پرۆژەكانی ئیدارەی گەرمیان.
٥- ٢،٠٠٠،٠٠٠،٠٠٠ دوو ملیار دینار بۆ سەرجەم پڕۆژەكانی ئیدارەی ڕاپەڕین.
٦- ٢،٠٠٠،٠٠٠،٠٠٠ دوو ملیار دینار بۆ سەرجەم پڕۆژەكانی پارێزگای هەڵەبجە.
٧- ٥،٠٠٠،٠٠٠،٠٠٠ پێنج ملیار دینار بۆ پڕۆژەی ڕێگای دوو سایدی كەلار - دەربەندیخان.
٨- ٢٠،٠٠٠،٠٠٠،٠٠٠ بیست ملیار دینار وەك شایستەی دارایی پڕۆژەی شەقامی (١٠٠) مەتری سلێمانی (شاڕێی بابان).
٩- ١،٥٠٠،٠٠٠،٠٠٠ یەك ملیار و پێنجسەد ملیۆن دینار پارەی خۆڵ و خاشاك.