سەرۆككۆماری سووریا، هەسەدە تۆمەتبار دەكات بە 'جووڵە و لێدوان'ـی پێچەوانەی ڕێكەوتننامەی نێوانیان 

پەرەگراف

سەرۆكایەتیی كۆماری سووریا، هەسەدە تۆمەتبار دەكات بە "جووڵە و لێدوان"ـی پێچەوانەی ڕێكەوتننامەی نێوان ئەحمەد شەرع و مەزڵووم عەبدی. دەڵێت "سەركردایەتیی هەسەدە بانگەشەی فیدراڵیزم دەكەن و واقیعێكی جوداخوازی لەسەر زەوی بەهێز دەكەن، هەڕەشە لە یەكێتیی وڵات و یەكپارچەیی خاكەكەی دەكەن".

ئەمڕۆ 27-04-2025، سەرۆكایەتیی كۆماری سووریا ڕاگەیەندراوێكی بڵاو كردەوە كە تێیدا هاتووە "یەكێتیی سووریا، وەك نەتەوە و گەل، هێڵی سوورە و هەر پێشێلكارییەكی ئەمە دەرچوونە لە یەكڕیزیی نیشتمانی و زیان بە ناسنامەی یەكگرتووی سووریا دەگەیەنێت".

"ئێمە بە توندی هەر هەوڵێك بۆ سەپاندنی واقیعێكی دابەشكەر، یان دروستكردنی قەوارەی جیاواز لەژێر ناوی فیدراڵیزم یان خۆبەڕێوەبەری، بەبێ كۆدەنگیی نیشتمانیی گشتگیر، ڕەت دەكەینەوە"، سەرۆكایەتیی كۆماری سووریا وا دەڵێت.

ڕاگەیەندراوەكەی سەرۆكایەتیی كۆماری سووریا پاش یەك ڕۆژ لە (كۆنفرانسی یەكڕیزی و یەكهەڵوێستیی كورد لە ڕۆژئاوای كوردستان) دێت، كە بە بەشداریی دەیان پارتی سیاسی و زیاتر لە ٤٠٠ كەسایەتی، لە شاری قامیشلۆ بەسترا. ئامانجی كۆنفرانسەكە یەكخستنی هەڵوێستی پارت و هێزەكانی ڕۆژئاوای كوردستان بوو لەپێناو مسۆگەركردنی مافەكانی كورد لە سووریای نوێدا.

تۆمەتباركردنی هەسەدە بە هەوڵی "جوداخوازی" لەلایەن سەرۆكایەتیی كۆماری سووریاوە، لە كاتێكدایە كە لە كۆنفرانسەكەی ڕۆژئاوای كوردستاندا هیچ قسە و بڕیارێكی لەو شێوەیە نەبووە، بە پێچەوانەوە شاندێكی هاوبەشی كوردی بۆ گفتوگۆ لەگەڵ دیمەشق پێك دەهێنرێت، هەروەها بەرپرسانی هەسەدە لە لێدوانەكانی پێشوویاندا ڕەتیان كردووەتەوە هەوڵی جوداخوازی یان پارچەكردنی سووریا بدەن.

سەرۆكایەتیی كۆماری سوووریا لە ڕاگەیەندراوەكەدا دەڵێت: جەخت لەسەر ئەم خاڵانەی خوارەوە دەكەینەوە:

- ڕێكەوتننامەكە (ڕێككەوتنی نێوان ئەحمەد شەع و مەزڵووم عەبدی) هەنگاوێكی بنیاتنەرە ئەگەر بە گیانێكی نیشتمانیی فراوان جێبەجێ بكرێت، دوور لە پڕۆژەی تایبەت یان حیزبی.

- ئێمە نیگەرانیی قووڵی خۆمان دەردەبڕین سەبارەت بە كردارگەلێك كە ئاماژە بە ئاراستەی مەترسیدار بەرەو گۆڕانكاریی دیمۆگرافی لە هەندێك ناوچە دەكەن، كە هەڕەشە لە پێكهاتەی كۆمەڵایەتیی سووریا دەكات و شانسەكانی چارەسەرێكی نیشتمانیی گشتگیر، لاواز دەكات.

- ئێمە هۆشداری دەدەین دەربارەی مەترسیی تێكدانی دامەزراوەكانی دەوڵەتی سووری لەو ناوچانەی ژێر كۆنتڕۆڵی (هەسەدە)، سنوورداركردنی دەستگەیشتنی هاووڵاتیان بە خزمەتگوزارییەكانیان، قۆرغكردنی سەرچاوە نیشتمانییەكان و بەكارهێنانیان لە دەرەوەی چوارچێوەی دەوڵەت. ئەم كردارانە دابەشبوون قووڵتر دەكەنەوە و هەڕەشە لە سەروەریی نیشتمانی دەكەن.

- سەركردایەتی هەسەدە ناتوانێت بە تەنیا بڕیار لەبارەی باكووری ڕۆژهەڵاتی سووریاوە بدات، كە تێیدا پێكهاتە ڕەسەنەكانی وەكو عەرەب، كورد، ئاشوری و ئەوانی تر پێكەوە دەژین. قۆرغكردنی پرۆسەی بڕیاردان و نوێنەرایەتیی هەر پێكهاتەیەك قبووڵ ناكرێت، چونكە ناتوانرێت سەقامگیری یان داهاتوویەك هەبێت، بەبێ هاوبەشیی ڕاستەقینە و نوێنەرایەتی دادپەروەرانەی هەموو لایەنەكان.

- ئێمە دووپاتی دەكەینەوە كە مافەكانی برایانی كوردمان، وەكو هەموو پێكهاتەكانی گەلی سووری، گەرەنتی كراون و پارێزراون لە چوارچێوەی دەوڵەتێكی یەكگرتووی سووریا، لەسەر بنەمای هاووڵاتیبوونی تەواو و یەكسانی لەبەردەم یاسا، بەبێ پێویستی بە هەر دەستوەردانێكی دەرەكی یان سەرپەرشتیی بیانی.

- ئێمە داوا لە لایەنەكانی ڕێكەوتننامەكە دەكەین، بەتایبەتی هەسەدە، كە بە دڵسۆزییەوە پابەندی ڕێكەوتننامەكە بن و بەرژەوەندیی باڵای نیشتمانی لە پێش هەر بەرژەوەندییەكی تەسك یان دەرەكی دابنێن.

- لە كۆتاییدا، ئێمە هەڵوێستی پتەوی خۆمان دووپات دەكەینەوە كە چارەسەر لە سووریا دەبێت تەنیا سووری، نیشتمانی و گشتگیر بێت، لەسەر بنەمای ویستی گەل، پاراستنی یەكێتی و سەروەریی وڵات، ڕەتكردنەوەی هەر شێوەیەكی سەرپەرشتی یان هەژموونی دەرەوە و بیانی.