پەرەگراف
نێچیرڤان بارزانی كۆبوونەوەكەی لەگەڵ ئەردۆغان بە "زۆر بەرهەمدار" وەسف دەكات، پرۆسەی ئاشتیش لە توركیا بە "دەرفەتێكی جیددی كە نابێت لەدەست بدرێت" ناو دەهێنێت و لەوبارەیەوە ستایشی ڕۆڵی ئەردۆغان دەكات.
ئێوارەی ئەمڕۆ هەینی 11-04-2025، لە چوارچێوەی بەشداریكردنیدا لە كۆڕبەندی ئەنتالیا، نێچیرڤان بارزانی، سەرۆكی هەرێمی كوردستان، لەگەڵ ڕەجەب تەیب ئەردۆغان، سەرۆككۆماری توركیا كۆبووەوە.
سەرۆكایەتیی هەرێم دەڵێت "لە كۆبوونەوەكەدا، باسیان لە گرنگیی پەیوەندییەكانی توركیا لەگەڵ عێراق و هەرێمی كوردستان لە هەموو بوارەكاندا كرد و تیشكیان خستە سەر پرۆژەی ڕێگەی گەشەپێدان. هەروەها جەختیان لەسەر خواستی دوولایەنە بۆ فراوانكردنی هاریكاریی هاوبەشی نێوانیان كردەوە، بە شێوەیەك خزمەت بە بەرژەوەندییە هاوبەشەكانی هەردوولا بكات".
لە تەوەرێكی دیكەی كۆبوونەوەكەدا، باسیان لە پرۆسەی ئاشتی و دوا كۆبوونەوەی ئەردۆغان لەگەڵ شاندی ئیمرالی كردووە. سەرۆكایەتیی هەرێم دەڵێت "سەرۆك نێچیرڤان بارزانی، وێڕای ستایشی ڕۆڵی سەرۆك ئەردۆغان لەمبارەیەوە، پرۆسەكەی بە مێژوویی لە قەڵەم دا و جەختی لەوە كردەوە كە هەرێمی كوردستان بۆ هەر هاوكارییەك لەپێناو سەرخستنی پرۆسەكەدا، ئامادەیە".
سەرۆكی هەرێم، پرۆسەی ئاشتی بە "دەرفەتێك كە دەبێت هەمووان زۆر بە جددی وەریبگرن و نابێت بە هیچ شێوەیەك لەدەست بدرێت" وەسف دەكات و جەختی كردووەتەوە "بۆ سەرخستنی پرۆسەی ئاشتی، پێویستە پەكەكە بەپیر بانگەوازی بەڕێز ئۆجالانەوە بچێت و بە تەواوی پابەندی بێت".
هەر لەبارەی كۆبوونەوەكەوە، نێچیرڤان بارزانی، سەرۆكی هەرێمی كوردستان، لە تۆڕی ئێكس دەڵێت "لە ئەنتاڵیا، كۆبوونەوەیەكی زۆر بەرهەمدارم لەگەڵ سەرۆك ڕەجەب تەیب ئەردۆغان هەبوو. جەختم لە گرنگیی كاراكردنەوەی پڕۆسەی ئاشتی لە توركیا، وەك ڕێگەیەكی سەقامگیری و ئاشتیی بەردەوام كردەوە".
"دووپاتم كردەوە كە پێویستە سوود لەم دەرفەتە وەربگیرێت و پەكەكەش بە شێوەیەكی ئەرێنی وەڵامی بانگەوازەكەی بەڕێز ئۆجەلان بداتەوە. هەروەها باسی كۆبوونەوەی ئەم دواییانەی سەرۆك ئەردۆغان و شاندی دەمپارتی و گرنگییەكەی بۆ گفتوگۆ و ئاشتیم كرد"، سەرۆكی هەرێم وا دەڵێت.