پەرەگراف
بەڕێوەبەرایەتی نەهێشتنی ماددەهۆشبەرەکان ڕایگەیاند، لە ماوەی ٢ هەفتەدا لە سنوری پارێزگای هەولێر، دەستبەسەر ٢٦ کیلۆ ماددەی هۆشبەردا گیراوەو ١١ تۆمەتبار دەستگیر کران.
بەڕێوەبەرایەتییەکە دەڵێت: لەژمارەیەک چالاکیدا لە دوو هەفتەی رابردوو، بەهاوکاری و هەماهەنگی نێوان بەرێوەبەرایەتی نەهێشتنی ماددەهۆشبەرەکان و بەڕێوەبەرایەتیەکانی ئاسایشی پیرمام و سۆران و چاودێری و بەدواداچوون، پاش وەرگرتنی بڕیاری دادوەری لێکۆڵینەوەی ئاسایش توانرا بڕی (٢٦) کیلۆو(٢٠٨)گرام ماددەی هۆشبەر لەجۆرەکانی (کریستاڵ و حەشیش و هیرۆین) هەڵبگیرێنەوەو دەستیان بەسەردا بگیرێت.
"بەهۆی ئەم چالاکییانەوە توانرا ژمارەیەک تۆڕی کڕین و فرۆشتن و بڵاوکردنەوەی ماددەی هۆشبەر دەستگیربکرێن و هەڵبوەشێنەوە کە پێکهاتوون لە ١١ تۆمەتبار".
لە دادگا دۆسیە بۆ تۆمەتباران کراوەتەوەو بەپێی یاسای بەرەنگاربوونەوەی ماددەهۆشبەرەکان و کارتێکەرە ئەقڵییەکان مامەڵەیان لەگەڵدا دەکرێت.
تەنیا لە هەولێر نییەو ئامارەکانی مادەی هۆشبەر لە سەرتاسەری کوردستان زەنگی مەترسیی لێدەدەن؛ بەپێی بەدواداچونی پەرەگراف، تەنیا لە ساڵی رابردوودا هەزار دۆسیەی ماددەی هۆشبەر لە پارێزگای دهۆك هەبووە، لە كاتێكدا دەیەیەك لەمەوبەر ئەو ژمارەیە لە 50 دۆسیە تێنەدەپەڕی، بەوپێیەش لەو ماوەیەدا ١٩ هێندە زیادی کردووە کە بە ڕێژەی سەدی دەکاتە ١٩٠٠%.
هاوکات بەپێى ئامارى فەرمیى بەڕێوەبەرایەتیى نەهێشتنى ماددە هۆشبەرەکان کە ئامارى نیوەى هەرێمى کوردستانە(سلێمانی و هەڵەبجەو گەرمیان و ڕاپەڕین)، دەستبەسەرداگرتنى ماددەى هۆشبەر لە ٢٠٢٤دا بەراورد بە ٢٠٢٣، ٦٥٩% زیادى کردووە و بۆ حەوت هێندە و نیو بەرز بووەتەوە، بەجۆرێک ٢٠٢٣ تەنیا ٣٩٨ کیلۆگرام ماددەى هۆشبەر دەستى بەسەردا گیراوە، بەڵام ٢٠٢٤ بۆ ٣٠٢٤ کیلۆگرام بەرز بووەتەوە. هاوکات ساڵی ڕابردوو دەستگیرکردنى تۆمەتبارانى ماددەى هۆشبەر بە ڕێژەیەکى کەم زیادى کردووە کە ٢.٨٣%یە، لە ٩٩١ تۆمەتبارەوە بۆ ١٠١٩ بەرز بووەتەوە.
بەپێی ئامارێكیش كە سایتی رەسمی حكومەتی هەرێمی كوردستان بڵاویكردۆتەوە؛ لە ساڵی 2019ـەوە تا 20ـی حوزهیرانی 2022 ژمارهی ئهو كهسانهی به هۆی ماددهی هۆشبهرهوه دهستگیر كراون و پهڕاوی لێكۆڵینهوهیان له دادگا بۆ كراوهتهوه، پێنج هەزار و 419 تۆمهتبار بوون، لەگەڵ دەستبەسەرداگرتنی زیاتر لە هەزار و 200 كیلۆ ماددەی جیاواز و نزیكەی 60 هەزار شیت و پاكەت لە دهرمانی پزیشكی هۆشبهر.