پەرەگراف
سەرۆكی هەرێمی كوردستان پرۆسەی ئاشتی لە توركیا بە "دەرفەتێكی گرنگ و مێژوویی" ناو دەبات و دەڵێت "پێویستە هەمووان كار بۆ سەرخستنی پرۆسەكە و برایەتیی كورد و تورك بكەن، چونكە ئاشتی بۆ هەمووان لە توركیا و ناوچەكە پێویستە".
نێچیرڤان بارزانی پاش كۆبوونەوە لەگەڵا شاندی ئیمرالی، جەختی كردووەتەوە كە "ئەزموون سەلماندوویەتی شەڕ و چەك هیچ كێشەیەك چارەسەر ناكەن". هەر بۆیە هیوا دەخوازێت كە "پەكەكە ستراتیژییانە لە پرۆسەكە بڕوانێت" و دەڵێت "پێویستە ئەم دەرفەتە لەدەست نەدرێت".
دەقی ڕاگەیەندراوی سەرۆكایەتیی هەرێمی كوردستان:
پێشنوەڕۆی ئەمڕۆ دووشەممە 2025/2/17 بەڕێز نێچیرڤان بارزانی، سەرۆكی هەرێمی كوردستان، پێشوازیی لە شاندی ئیمرالی كرد كە بۆ ڕاگۆڕینەوە و گفتوگۆ دەربارەی هەوڵەكانی پرۆسەی ئاشتی لە توركیا، لە هەرێمی كوردستانن.
لە كۆبوونەوەكەدا، سەرۆك نێچیرڤان بارزانی هەموو هاوكاری و پشتگیرییەكی بۆ سەركەوتنی پرۆسەی ئاشتی لە توركیا دووپات كردەوە، هەروەها پرۆسەكەی بە دەرفەتێكی گرنگ و مێژوویی لە قەڵەم دا كە پێویستە هەمووان كار بۆ سەرخستنی پرۆسەكە و برایەتیی كورد و تورك بكەن، چونكە ئاشتی بۆ هەمووان لە توركیا و ناوچەكە پێویستە.
سەرۆك نێچیرڤان بارزانی هەروەها ڕایگەیاند: ئێمە هەر لە سەرەتاوە هەمیشە كارمان كردووە بۆ ئەوەی پرۆسەی ئاشتی بێتە ئاراوە و كێشەكان ئاشتیانە چارەسەر بكرێن، چونكە ئەزموون سەلماندوویەتی شەڕ و چەك هیچ كێشەیەك چارەسەر ناكەن. هەروەها هیوای خواست كە PKK ستراتیژییانە لە پرۆسەكە بڕوانێت و پێویستە ئەم دەرفەتە لەدەست نەدرێت.
لای خۆیەوە شاندی ئیمرالی سڵاو و ڕێزی تایبەتی بەڕێز ئۆجالانی بە سەرۆك نێچیرڤان بارزانی گەیاند و تێشكیان خستە سەر هەنگاوەكانی پرۆسەكە. شاندەكە هەروەها ستایش و پێزانینی بۆ هەوڵەكانی سەرۆك نێچیرڤان بارزانی لە پرۆسەی پێشتر و ئێستای ئاشتیدا دەربڕی و داوای كرد بەڕێزیان لەسەر هاوكاری و پشتگیریی خۆی بۆ سەرخستنی پرۆسەكە بەردەوام بێت.