ئاسایشی هەولێر: لە کاتی گەشتکردنی هاووڵاتیان، پێویستە ڤیزەکارد یان ماستەرکارد بە ناوی خودی گەشتیارەوە بێت

پەرەگراف

بەڕێوەبەرایەتیی ئاسایشی ئابووری سەر بە ئاسایشی گشتیی هەولێر هۆشداری دەداتە ئەو هاووڵاتیانەی گەشتی دەرەوە دەکەن کە خۆیان بپارێزن لە هەڵگرتن و بەکارهێنانی ڤیزەکارد یان ماستەرکاردی کەسانی دیکە، بەڵکو دەبێت بە ناوی خۆیانەوە بێت، بە پێچەوانەوە ڕێکاری یاسایی لە بەرامبەر خۆیان و ئەو کەسانەش کە کارتەکانیان بەناوەوەیە دەگیرێتە بەر.

بەڕێوەبەرایەتیی ئاسایشی ئابووری ڕاگەیەندراوێکی دوو کردووەتەوە و لە خاڵی یەکەمدا دەڵێت "لە کاتی گەشتکردنی هاووڵاتیان، پێویستە ڤیزەکارد یان ماستەرکارد بە ناوی خودی گەشتیارەوە بێت، بە پێچەوانەوە کارتە بانکییەکە دەستی بەسەردا دەگیرێت و هاووڵاتییەکەش ڕووبەڕووی لێپێچینەوەی یاسایی دەبێتەوە".

لە خاڵی دووەمیشدا هاتووە "ئەو هاووڵاتییانەی هەڵگری ژمارەیەکی زۆر لە ڤیزەکارد یان ماستەرکاردن بە ناوی خەڵکی ترەوە و بە ناوی خۆیانەوە نییە، لە کاتی گەشتکردنیاندا ڤیزەکارد یان ماستەرکاردەکان دەستی بەسەردا دەگیرێت".

ئاسایش هۆشداری دەدات کە لە حاڵەتی دووەمدا، "هەم هەڵگری ئەم جۆرە کارتانە و هەم ئەو هاوڵاتییانەی کە ڤیزەکارد یان ماستەرکارد بە ناویانەوەیە، ڕووبەرووی لێپێچینەوەی یاسایی دەبنەوە و کارتە بانکییەکانیش بلۆک دەکرێن".

بەڕێوەبەرایەتیی ئاسایشی ئابووری سەر بە ئاسایشی گشتیی هەولێر داوا لە هاووڵاتیان دەکات "ئاگاداری بەڵگەنامە تایبەتییەکانیان بن و ڕێگە نەدەن خەڵکی تر بەکاریان بهێنێت بۆ دروستکردنی هەژماری بانکی و کارتی بانکی، یان کارتەکانیان بدرێتە کەسانی دیکە و مامەڵەی پێوە بکرێت، بۆ ئەوەی تووشی لێپێچینەوەی یاسایی نەبنەوە".