پەرەگراف
سەرچاوەیەک لە فڕۆکەخانەی سلێمانی بە پەرەگرافی ڕاگەیاند "توركیا قەدەغەی گەشتەكانی لەگەڵ فڕۆكەخانەی سلێمانی بۆ ماوەی شەش مانگی دیكە درێژ كردەوە". بەوەش ماوەی قەدەغەی گەشتەكان كە ئێستا 21 مانگی تێپەڕاندووە، بە تەواوكردنی ئەم شەش مانگە دەبێت بە دوو ساڵ و سێ مانگ.
تورکیا لە 3-4-2023دا ئاسمانی وڵاتەکەی بە ڕووی ئەو فڕۆکانەدا داخست کە فڕۆکەخانەی نێودەوڵەتیی سلێمانی بۆ نیشتنەوە یان بەرزبوونەوە بەکار دەهێنن. بڕیارەکەی تورکیا بۆ ماوەی سێ مانگ و تا 3-7-2023 بوو، بەڵام دواتر سێ جار و هەرجارەی شەش مانگی دیکەی درێژى کردەوە، ئێستاش شەش مانگی دیکەی درێژکردەوە و بەوەش قەدەغەکردنەکە تا ناوەڕاستی ئەمساڵ بەردەوام دەبێت.
وەزارەتی دەرەوەی تورکیا ئەوکات دوای ڕاگرتنی گەشتەکان، هۆکاری داخستنی ئاسمانی وڵاتەکەی بە ڕووی سلێمانیدا ئاشکرا کردو وتی "بەهۆی چالاکییەکانی پەکەکەوەیە و لە چوارچێوەی هەوڵەكانی ڕووبەرووبوونەوەی پارتی كرێكارانی كوردستانە".
بە وتەی وەزارەتی دەرەوەی تورکیا، "چالاکییەکانی پەکەکە لە سلێمانی زیادیان کردووە و دزەیان کردووەتە ناو فڕۆکەخانە، ئەوەش هەڕەشە لە ئاسایشی فڕۆکەوانی دەکات".
بەرپرسانی سلێمانی تۆمەتەکانی تورکیا ڕەت دەکەنەوە و بەردەوام جەخت لە مەدەنیبوونی فڕۆکەخانەکە دەکەنەوە.