پەرەگراف
مەكتەبی سیاسیی یەكێتیی نیشتمانی لە پەیامێكدا بەبۆنەی سەری ساڵی زایینییەوە، دەڵێت "لە ساڵی 2025دا كۆشش بۆ ڕاستكردنەوەی ڕێڕەوی حوكمڕانی و گێڕانەوەی هاوسەنگیی هێز دەكەین".
مەكتەبی سیاسیی یەكێتی دەشڵێت "بەرەو حوكمڕانی و حكومەتێكی نوێی خزمەتگوزار و بەرپرس و پرۆسەیەكی سیاسیی كاراو دیموكرات و دەربەست".
دەقی ڕاگەیەندراوی مەكتەبی سیاسیی یەكێتی:
ساڵی نوێ لە گەلەكەمان، لە كۆمەڵانی خەڵكی عیراق و جیهان پیرۆز بێت، ساڵی ئاشتی و ئاوەدانی ، ماف و دادپەروەری و چارەسەری رەوای مەسەلەی كورد لە رۆژهەڵاتی ناوەڕاست بێت لەسەروبەندی گۆڕانكاری ناوچەكە ، بە دیالۆگی سیاسیی و ئاشتی و دیموكراتی.
بۆ كۆمەڵانی خەڵكی كوردستانیش ساڵی بەدیهاتنی ژیان و گوزەرانی باشتر و تێپەڕاندنی دژواری و قەیرانەكانی نێوان هەرێمی كوردستان و بەغدا بێت بە تایبەتی ئیستحقاقی مووچە بە گوێرەی بڕیارەكانی دادگای فیدراڵی، دوور لە تێكەڵكردنی بە دۆسێ سیاسییەكان.
هەر بەو بۆنەوە یەكێتیی نیشتمانیی كوردستان پابەندێتی خۆی بە سیاسەتی ڕاستكردنەوەی رێڕەوی حوكمڕانی و گێرانەوەی هاوسەنگی هێز بۆ ئەزموونەكەمان، هەر وەك بەڵێنی بە خەڵكەكەمان دابوو، دووپات دەكاتەوەو لە هەموو وێستگەكانی ساڵی ٢٠٢٥ یشدا كۆششی ڕەوای بۆ دەكات، بەرەو حوكمڕانی و حكومەتێكی نوێی خزمەتگوزار و بەرپرس و پرۆسەیەكی سیاسیی كاراو دیموكرات و دەربەست.
هیوامان وایە ساڵی ٢٠٢٥ ساڵی گەشەی زیاتری پرۆسەی دیموكراتی وڵاتەكەمان و ساڵی دابینكردنی ئیستحقاقە دەستورییەكانی تری كورد بێت.
جارێكی تر پیرۆزە
مەكتەبی سیاسی
یەكێتیی نیشتمانیی كوردستان