ڕۆژنامەنووسان و سەندیكا و ڕێكخراوەكان داوای ڕاگرتنی بەئامانجگرتنی ڕۆژنامەنووسان لەلایەن توركیاوە دەكەن
پەرەگراف
ڕۆژنامەنووسان، سەندیكا و ڕێكخراوەكان لە سلێمانی ئیدانەی بەئامانجگرتنی ڕۆژنامەنووسان بەتایبەت لەلایەن توركیاوە دەكەن كە لە ماوەی "پێنج ساڵدا 13 ڕۆژنامەنووسی تیرۆر كردووە". داوایش لە ڕێكخراوە نێودەوڵەتییەكانی تایبەت بە پاراستنی مافی مرۆڤ دەكەن "فشار بخەنە سەر حكومەتی توركیا بۆ دوورخستنەوەی ئاگری شەڕ لەو كەسانەی دەستیان لە هەڵگیرسانی جەنگدا نییە".
ئەمڕۆ 22-12-2024، كۆمەڵێك لە ڕۆژنامەنووس و چالاكانی مەدەنی و سەندیكای ڕۆژنامەنووسان و ڕێكخراوەكان، لە ئۆفیسی سەنتەری میترۆ لە شاری سلێمانی كۆنگرەیەكی ڕۆژنامەوانییان ئەنجام دا و پەیام خۆیان لەبارەی بەئامانجگرتنی ڕۆژنامەنووسان خستە ڕوو، كە نوێترینیان كوشتنی دوو ڕۆژنامەنووسی ئاژانسی هەواڵی هاوار بوو لە كۆبانێ لە بۆردوومانێكدا لەلایەن توركیاوە.
دیاری محەمەد، بەڕێوەبەری سەنتەری میترۆ بۆ داكۆكی لە مافی ڕۆژنامەنووسان، وتی "دووبارە ئیدانەی تیرۆركردنی ڕۆژنامەنووسانی ئاژانسی هاوار (جیهان بیلگین و نازم داشتان) دەكەین، جەخت دەكەینەوە لەوەی فشار زیاتر بكەین تا ڕێكخراوە نێدەوڵەتییەكانی تایبەت بە پاراستنی مافی مرۆڤ كار بكەن بە ئامانجی ڕاگرتنی حكومەتی توركیا لە كوشتنی ڕۆژنامەنوسان".
كۆمپانیای چەتر بۆ بەرهەمهێنانی میدیایی دەڵێت "جیهان بیلگین و نازم داشتان ڕۆڵێكی كارایان هەبوو لە ڕووماڵكردنی هێرشەكانی توركیا بۆ سەر بەنداوی تشرین و شاری كۆبانێ، ئەوان تواییان ڕاستییەكان بۆ ڕایگشتی بگوازنەوە و ڕاگەیاندنی شەڕی تایبەت بەدرۆ بخەنەوە".
هەروەها نوێنەری ژنانی ڕۆژنامەنووسی ئازاد لە كۆنگرە ڕۆژنامەوانییەكەدا وتی "لە ماوەی پێنج ساڵدا، دەوڵەتی توركیا بە شێوەی ڕاستەوخۆ و لە ڕێگەی فڕۆكەی بێفڕۆكەوانەوە 13 ڕۆژنامەنووسی تیرۆر كردووە". كوشتنی ڕۆژنامەنووسانیشی لەلایەن توركیاوە بە "ترس لە خستنەڕووی ڕاستییەكان" ناو برد.
پێشتریش لە 23ی ئابی 2024، لە نزیك قەزای سەیدسادق ڕۆژنامەنووسان (گوڵستان تارا و هێرۆ بەهادین) میدكارانی كۆمپانیای چەتر لەلایەن درۆنی توركیاوە كرانە ئامانج و كوژران. هەروەها ڕۆژی 8ی تەمووزی 2024 هێزی ئاسمانیی توركیا لە كۆمەڵگەی تەل قەسەبی شنگال كارمەندانی چرا تیڤی و چرا ئێف ئێم (مەدیا حەسەن كەمال و موراد میرزا برایم و خەلەف خدر)ـی كردە ئامانج، كە (موراد میرزا) پەیامنێری كەناڵی چرا ئێف ئێم، بەهۆی سەختیی برینەكەیەوە گیانی لەدەست دا.