پەرەگراف
وەزارەتی دەرەوەی ئەمریكا ڕایگەیاند "ئاگربەستی نێوان توركیا و هەسەدە تا كۆتایی ئەم هەفتە درێژ كراوەتەوە". جەختیش دەكاتەوە "لە هەوڵدا دەبین بۆ درێژكردنەوەی ئاگربەست تا درێژترین ماوە كە بتوانین".
ماتیۆ میلەر، وتەبێژی وەزارەتی دەرەوەی ئەمریكا، لە كۆنفڕانسێكی ڕۆژنامەوانیدا وتی "ئەمریكا لە نیگەرانییە ڕەواكانی توركیا لەبارەی پەكەكەوە تێدەگات". هاوكات ڕایگەیاند "پێمان وایە لە بەرژوەندیی هیچ لایەكدا نییە ئەم ئاڵۆزییانە بەردەوام بن".
میلەر سەبارەت بە پێشهاتەكانی مەنبج پاش كۆتاییهاتنی ئاگربەست، ڕایگەیاند "دەربارەی بارودۆخی باكووری سووریا، لەگەڵ توركیا لە پەیوەندیداین و كار دەكەین بۆ درێژكردنەوەی ئاگربەستی مەنبج تا درێژترین ماوە كە بتوانین".
پێشتر ئاگربەستێك لە مەنبج لەنێوان هەسەدە و توركیا و گرووپەكانی نزیك لە توركیا بە نێوەندگیریی ئەمریكا ئەنجام درا كە ئێوارەی دوێنێ دووشەممە كۆتایی هات.