دەستەی دەستپاكی: گەندەڵی هەڕەشەیەكی گەورەیە لەسەر حوكمڕانی و باشتركردنی گوزەرانی هاووڵاتیان
پەرەگراف
سەرۆكی دەستەی دەستپاكی لە هەرێمی كوردستان دەڵێت "تا ئێستا گەندەڵی لە هەرێمی كوردستان و عێراق هەڕەشەیەكی گەورەیە لەسەر پرۆسەی حوكمڕانی و باشتركردنی ژیان و گوزەرانی هاووڵاتیان. سەرباری هەوڵەكان، هێشتا عێراق لە ڕیزبەندیی نێوان 20 بۆ 25ـەمی گەندەڵترین وڵاتەكاندایە". هاوشێوەی ساڵانی ڕابردوو دووپاتیشی دەكاتەوە كە "هەشت ساڵە داوای دامەزراندنی دادگایەكی تایبەت بە یەكلاكردنەوەی دۆسیەكانی گەندەڵی دەكەین، بەڵام تا ئێستا نەكراوە".
ڕۆژی 9ـی كانووی دووەمی هەموو ساڵێك لەلایەن نەتەوەیەكگرتووەكانەوە بە ڕۆژی بەرەنگاربوونەوەی گەندەڵی دیاری كراوە. دەستەی دەستپاكی لە هەرێم ساڵانە لەم ڕۆژەدا ئامار و داتاكان سەبارەت بە گەندەڵی و لەمپەرەكانی بەردەم كارەكانیان دەخاتە ڕوو.
حاكم ئەحمەد ئەنوەر، سەرۆكی دەستەی دەستپاكیی هەرێمی كوردستان، ئەمڕۆ لە كۆنفرانسێكی ڕۆژنامەوانیدا ڕایگەیاند "ئەمساڵ 207 كەیسی گەندەڵی ڕەوانەی دادگاكان كراون، لەو ژمارەیە 27یان یەكلاكراونەتەوە و 167یان لە دادگاكاندان و 13 كەیسیش بەهۆی كەموكورتییەوە گەڕێندراونەتەوە بۆ دادوەرانی لێكۆڵینەوەی دەستپاكی".
بەپێی داتاكانی دەستەی دەستپاكی، لە 11 مانگی ئەمساڵدا (1-1-2024 تا 1-12-2024)، لە دەستەی دەستپاكی "573 داوای سزایی و 221 داوای هەواڵدەری" تۆمار كراون، كە لەو ژمارەیە "223"ـی سزاییان ڕەوانەی دادگاكان كراون.
ئێستا كۆی داواكان كە لەژێر لێكۆڵینەوی دەستەی دەستپاكیدان، "هەزار و 47"داواكارین كە بەشێكیان هی ساڵانی پێشترن و هێشتا فریا نەكەوتوون یەكلایان بكەنەوە، بەهۆی ئەوەی پێویستیان بە لێكۆڵینەوەی ورد و زیاترە.
سەرۆكی دەستەی دەستپاكیی هەرێمی كوردستان ئاماژە بەوە دەكات كە دۆسیەی بەرپرسانی پلەباڵا لەناو كەیسەكانی گەندەڵیدا هەیە و دەڵێت "زیاتر لە 100 بەرپرسی پلەباڵا لە وەزیر و بەڕێوەبەری گشتی و پلەكانی خوارتر، لە دادگاكانی لێكۆڵنەوەی دەستپاكی لێكۆڵینەوەیان لەگەڵد كراوە".
بەڵام ئەوەی جێگای سەرنجە لای خەڵك، سزانەدانی بەرپرسانی باڵایە لەسەر كەیسەكانی گەندەڵی، لەكاتێكدا بەرپرسان خۆیان باس لە بوونی گەندەڵیی گەورە لە هەرێم دەكەن. حاكم ئەحمەد ئەنوەر دەڵێت "ئێمە دەسەڵاتی ئەوەمان نییە ڕاستەوخۆ كەیسەكان بنێرینە دادگاكان، بەڵكو ئەو دەسەڵاتە دراوە بە دادوەرانی دەستی دەستپاكی كە ئەندامی دەستەی دادوەرین".
دەستەی دەستپاكیی هەرێم كێشەی كەمیی توانای مرۆیی هەیە و سەرۆكەكەی دەڵێت "ماوەی زیاتر لە هەشت ساڵە بە بوونی تەنیا 22 لێكۆڵەری دەستپاكی لە سەرتاسەری هەرێمی كوردستان، لە بەرانبەر كەرتێكی گشتی كە خۆی لە زیاتر لە 800 هەزار فەرمانبەردا دەبینێتەوە، ئەركەكانی خۆمان جێبەجێ دەكەین".