16 پەرلەمانتار خۆیان بۆ سەرۆك و جێگر و سكرتێری پەرلەمان كاندید كرد؛ كاندیدەكان كێن؟
پەرەگراف
لە یەكەم دانیشتنی خولی شەشەمی پەرلەمانی كوردستاندا 16 پەرلەمانتار خۆیان بۆ پۆستەكانی سەرۆك و جێگر و سكرتێری پەرلەمان كاندید كرد، بەڵام بەهۆی تەواونەبوونی ڕێژەی یاسایی، دەنگدان نەكرا و دانیشتنەكە هەڵدەگیرێت. پەرلەمان ناتوانێت سەربەخۆ ئەو پۆستانە یەكلا بكاتەوە و پرسەكە بە دانوستانی نێوان لایەنەكان دەسپێردرێت كە دیار نییە چەند دەخایەنێت.
پاش سوێندخواردنی كاندیدە دەرچووەكان لە دانیشتنەكەی ئەمڕۆی پەرلەمانی كوردستاندا، سەرۆكی كاتیی پەرلەمان دەرگای خۆپاڵاوتنی بۆ پۆستەكانی دەستەی سەرۆكایەتیی پەرلەمان كردەوە.
پێنج پەرلەمانتار خۆیان بۆ پۆستی سەرۆكی پەرلەمان و پێنج پەرلەمانتار خۆیان بۆ جێگری سەرۆكی پەرلەمان و شەش پەرلەمانتار خۆیان بۆ پۆستی سكرتێری پەرلەمان كاندید كرد.
بۆ پۆستی سەرۆكی پەرلەمانی كوردستان، هەریەك لە (ڤالا فەرید، هەڵگورد نەجیب) لە فراكسیۆنی پارتی و (شاڵاو كۆسرەت ڕەسووڵ، میران محەمەد) لە فراكسیۆنی یەكێتی و (كوردەوان جەمال) لە فراكسیۆنی نەوەی نوێ كاندیدن.
بۆ پۆستی جێگری سەرۆكی پەرلەمان، هەریەك لە (بەهجەد عەلی، مەرد عەلی) لە فراكسیۆنی پارتی و (ئازاد محەمەدئەمین، ئومێد عەلی) لە فراكسیۆنی یەكێتی و (عەدنان حسێن) لە فراكسیۆنی نەوەی نوێ هەن.
دانیشتنی یەكەمی پەرلەمانی كوردستان كە دەبێت دەستەی سەرۆكایەتیی پەرلەمانی تێدا هەڵببژێردرێت، نیوەڕۆی ئەمڕۆ دەستی پێ كرد و پاش سوێندخواردنی پەرلەمانتاران، دانیشتنەكە چەند كاتژمێرێك ڕاگیرا بەهۆی تەواونەبوونی ڕێژەی یاسایی بۆ دەنگدان لەسەر كاندیدەكانی دەستەی سەرۆكایەتیی پەرلەمان.
بەهۆی ئەوەی كە زۆرێك لە پەرلەمانتاران پەرلەمانیان جێهێشتووە، ڕێژەی یاسایی بۆ بەردەوامیی دانیشتنەكە تەواو نەبووە و دانیشتنەكە بە كراوەیی دەمێنێتەوە تا حیزبەكان لە دانوستانەكانی نێوانیان لەسەر دابەشكردنی پۆستەكان ڕێك دەكەون.
فراكسیۆنی یەكگرتوو لە كۆبوونەوەكەدا ڕایانگەیاند "لەبەر ئەوەی هەڵبژاردنی دەستەی سەرۆكایەتیی پەرلەمانی كوردستان لەگەڵ پێكهێنانی حكومەت كراوە بە یەك پاكێج، ئێمە بڕیارمان داوە دەنگ بە دەستەی سەرۆكایەتیی پەرلەمان نادەین".