سەرۆكوەزیرانی عێراق ئەنجامی سەرەتایی سەرژمێریی ‏گشتیی ڕاگەیاند

پەرەگراف

محەمەد شیاع سوودانی، سەرۆكوەزیرانی عێراق، ئەنجامی سەرەتایی سەرژمێریی ‏گشتیی ڕاگەیاند. ‏بەپێی ئەنجامەكە ژمارەی دانیشتووانی عێراق 45 ملیۆن كەسی تێپەڕاند و پێچەوانەی بۆچوونی ‏باوی ناو كۆمەڵگایش ژمارەی ڕەگەزی نێر لە مێ‌ زیاترە.‏

سوودانی لە كۆنگرەیەكی ڕۆژنامەوانیدا لە بەغدا ڕایگەیاند "ژمارەی دانیشتووانی عێراق گەیشتە ‏‏45 ملیۆن و 407 هەزار و 890 كەس‎، كە 70.3٪ـی نیشتەجێی شارەكان و 29.7٪ـیان ‏نیشتەجێی گوندەكانن‎".

بەپێی ئەو داتایانەی سەرژمێری كە سەرۆكوەزیرانی عێراق خستیە ڕوو، ژمارەی خێزان لە عێراق ‏حەوت ملیۆن و 898 هەزار و 588 خێزانە، ژمارەی ناوەندیی ئەندامانی خێزان 5.3 كەسە‎.‎

لە عێراقدا ژمارەی ڕەگەزی نێر 22 ملیۆن و 784 هەزار و 62 كەسە، كە بە ڕێژە دەكاتە 50.1٪ـی ‏دانیشتووان، لە كاتێكدا ژمارەی ڕەگەزی مێ 22 ملیۆن و 623 هەزار و 833 كەسە، كە دەكاتە ‏‏%49.8ـی دانیشتووان‎.‎‏ ئەمەش پێچەوانەی ئەو بیركردنەوە باوەی ناو كۆمەڵگەی عێراقییە كە پێی ‏وا بووە ژمارەی ڕەگەزی مێ‌ زۆر لە نێر زیاترە.‏