پەرەگراف
ئاسایشی هەولێر و وتەبێژی لیستی یەكێتی، دوو چیرۆكی جیاواز لەبارەی ڕووداوی تەقەكردن لەناو پرسەكەی هەولێردا دەگێڕنەوە. لایەك پاسەوانەكانی شاڵاو كۆسرەت ڕەسووڵ تۆمەتبار دەكات و لایەكەی دیكە ڕەتی دەكاتەوە و دەڵێت "لە ڕێگەی ئاژاوەگێڕییەوە هەوڵی تێكدانی هەڵبژاردن دەدرێت".
ئەمڕۆ لە كاتی بەشداریكردنی شاڵاو كۆسرەت ڕەسووڵ، سەرۆكی لیستی یەكێتی لە بازنەی هەولێر، لە پرسەی كەسایەتی (تۆفیق حاجی حەمەكە)، گرژی و تەقەكردن دروست بووە و برینداریشی لێ كەوتووەتەوە.
بەڕێوەبەرایەتیی ئاسایشی هەولێر لەبارەی ڕووداوەكەوە دەڵێت "شاڵاوی كۆسرەت ڕەسووڵ بەبێ ئاگاداركردنەوەی پێشوەختەی بنەماڵەی قەهاری سابیر عەلكە (كە كەسوكاری كۆچكردووەكەن)، سەردانی پرسەكەیانی كردووە، لەلایەن بنەماڵەی خاوەن پرسەكە پێی گوتراوە كە پرسەكە بەجێ بهڵێت و ڕەزامەند نەبوون لەسەر سەردانەكەی".
ئاسایشی هەولێر، بنەماڵەی شاڵاو كۆسرەت ڕەسووڵ تۆمەتبار دەكات بەوەی "لە ڕابردوودا دوو كەسی خاوەن پرسەكە بە دەستی ئەوان شەهید كراون"، دەشڵێت "بەم هۆیەوە دەبێتە دەمەقاڵەیان و پاسەوانەكانی شاڵاو بە بێ گوێدانە هیچ ڕێزێك بۆ حەرەمی مزگەوت و خاوەنی پرسەكە، هێرشیان كردووەتە سەر خاوەنی پرسەكە و تەقەیەكی زۆریان كردووە".
"لە ئەنجامدا هاووڵاتییەك بە گوللەی پاسەوانەكانی شاڵاو بریندار بووە. لێرەوە دووپاتی دەكەینەوە یاسا سەروەرە و ئەو كەسانەی تەقەیان كردووە و لەم كارە نایاساییە بەشدار بوون، ڕووبەڕووی یاسا دەكرێنەوە"، ئاسایشی هەولێر وا دەڵێت.
لە بەرانبەردا وتەبێژی لیستی یەكێتی دەڵێت "لە كاتی بەشداریكردنی شاڵاو كۆسرەت ڕەسووڵ لە پرسەی كۆچكردوو (تۆفیق حاجی حەمەكە) كە خانەوادەیەكی یەكێتین، كوڕێكی (قەهاری سابیر عەلكە) لەناو مزگەوت قسەی نەشیاو دەكات، لە بەرامبەردا لە پای ڕێزگرتن لە حەرەمی مزگەوت و خانەوادەی كۆچكردوو، شاڵاو كۆسرەت ڕەسووڵ وەڵامی ناداتەوە".
كاروان گەزنەیی، وتەبێژی لیستی یەكێتی نیشتمانی، دەشڵێت "پاشان، پاسەوانەكانی قەهار، لە كاتی جێهێشتنی مزگەوت لەلایەن شاڵاو كۆسرەت ڕەسووڵ، لەناو مزگەوتەكەدا تەقە دەكەن".
وتەبێژی لیستی یەكێتی ڕووداوەكە بە "نانەوەی ئاژاوە بەهۆی ترس لە شكستی هەڵبژاردن" ناو دەبات و دەڵێت "لە ماوەی چەند ڕۆژێكدا، دووەم جارە ئەم ئاكارە ناشیرینە لە بازاڕی هەولێر و لە حەرەمی مزگەوتیش دووبارە بووەتەوە و لە ڕێگەی كاری ئاژاوەگێڕییەوە هەوڵ بۆ تێكدانی هەڵبژاردن دەدرێت".
كاروان گەزنەیی لەگەڵ جەختكردنەوە لەسەر "بانگەشەیەكی هێمن و مەدەنی و دیموكراسی"، ڕووداوەكەش بە "هەوڵی نەزۆك بۆ تێكدانی ئارامی و بەڕێوەچوونی هەڵبژاردن لە كاتی خۆیدا" ناو دەبات.