فراكسیۆنی پارتی گەڕایەوە ئەنجوومەنی پارێزگای كەركووك، بەڵام بەشداریی كۆبوونەوە ناكات
پەرەگراف
ئەندامەكانی فراكسیۆنی پارتی لە ئەنجوومەنی پارێزگای كەركووك گەڕانەوە بۆ ناو بینای ئەنجوومەنەكە و ئۆفیسەكانی خۆیان كردەوە، بەڵام جارێ بەشداری لە كۆبوونەوەكانی ئەنجوومەن ناكەن.
حەسەن مەجید، سەرۆكی فراكسیۆنی پارتی لە ئەنجوومەنی پارێزگای كەركووك، ڕایگەیاند "مافی خۆمانە دەرگای نووسینگەكانمان بۆ خزمەتكردنی خەڵكی كەركووك بكەینەوە و بەڵێنی ئەوەش دەدەین كە لە ئەمڕۆوە خزمەتی دەنگ و ڕەنگە جیاوازەكان بكەین".
ئەندامەكانی پارتی بەردەوام دەبن لە بایكۆت و بەشداریی كۆبوونەوەكانی ئەنجوومەنی پارێزگای كەركووك ناكەن، وەكوو خۆیان دەڵێن "تا دادگای باڵای فیدراڵی لەبارەی یاساییبوون یان نەبوونی دانیشتنەكەی ئوتێل ڕەشید بڕیار دەدات".
سەرۆكی فراكسیۆنی پارتی لە ئەنجوومەنی پارێزگای كەركووك دەشڵێت "پەیوەندیمان لەگەڵ هەموو ئەندامانی ئەنجوومەنی پارێزگای كەركووك زۆر باشە، كێشەمان لەگەڵ خودی كەسایەتیی پارێزگار و سەرۆكی ئەنجوومەن نییە، بەڵكوو تەنیا تێبینیمان لەسەر شێوەی یاسایی دانیشتنەكەی ئوتێل ڕەشید هەیە و چاوەڕوانین دادگای فیدراڵی بەرچاوڕوونیمان لەوبارەیەوە پێ بدات".
ڕۆژی 10-8-2024، لە هۆتێل ڕەشید لە بەغداد، دانیشتنی ئەنجوومەنی پارێزگای كەركووك بە بەشداریی نۆ ئەندام بەڕێوە چوو، تێیدا ڕێبوار تەها لە پشكی یەكێتی بە پارێزگاری كەركووك و محەمەد حافز لە كوتلەی عەرەبی بە سەرۆكی ئەنجوومەنی پارێزگا هەڵبژێردران
لە دانیشتنەكەدا پێنج ئەندامەكەی یەكێتی و سێ ئەندامی پێكهاتەی عەرەب و ئەندامەكەی كریستیان بەشدارییان كرد، بەڵام دوو ئەندامەكەی پارتی و سێ ئەندامی عەرەب و دوو ئەندامەكەی توركمانیش لە ئەنجوومەنی پارێزگا، بایكۆتیان كرد.
پارتی و توركمان و ئەو سێ ئەندامە عەرەبەی بەشداریی كۆبوونەوەكەیان نەكرد، كۆبوونەوەكە بە "نایاسایی" ناو دەبەن و لە داگای فیدراڵی سكاڵایان دژی تۆمار كردووە.
ئەو لایەنانە دوو ڕەخنەی سەرەكییان لە دانیشتنەكە هەیە، یەكەم: كۆبوونەوەكە لە ئەنجوومەنی پارێزگای كەركووك ئەنجام نەدراوە، بەبێ ئەوەی "هیچ ڕێگرییەكی ئەمنی و یاسایی" هەبێت. دووەم: كۆبوونەوەكە دەبوو لەلایەن سەرۆكی تەمەن كە ڕاكان جبوورییە و بەتەمەنترین ئەندامی ئەنجوومەنەكەیە، سەرۆكایەتی بكرێت.
دواتریش وتەبێژی بارەگای بارزانی ڕایگەیاند "دەبێت پارێزگاری كەركووك كوردێكی میانڕەو بێت و لایەنە كوردییەكانی دیكەش لەسەری ڕازی بن". وتیشی "ڕێككەوتنی چەواشەكارانە لەوبارەیەوە، ئەنجامەكەی شكستە."
خالیدە خەلیل، وتەبێژی بارەگای بارزانی، ڕۆژی شەممە 17-08-2024، ڕایشیگەیاند "پێویستە لەسەر سەرۆكی ئەنجوومەن و جێگرەكەیشی ڕێككەوتن بكرێت".
"ناڕەزایەتیی ئێمە لە پێشێلكردنی ڕێككەوتنی نیشتمانی و جێبەجێكردنی ئەجێندایەكی سەیر و نامۆیە، كە ئامانجی هێنانە كایەی كێشە و ناهاوسەنگییە"، وتەبێژی بارەگای بارزانی وای وت.