پەرەگراف
سەرۆكوەزیرانی عێراق ڕایدەگەیەنێت "تەنیا دوو بژاردە بۆ چارەسەری كێشەی نەوتی هەرێم هەیە، ئەوانیش هەمواركردنەوەی گرێبەستی كۆمپانیاكان و هەمواركردنەوەی یاسای بودجەیە".
بەپێی قسەی سوودانی، بژاردەی یەكەم لەلایەن كۆمپانیاكانەوە "ڕەت كراوەتەوە" و دووەمیشیان پێویستی بە "ڕێككەوتنی سیاسی" هەیە، بەڵام بێ هیوا نییە و پەرۆشیی خۆی بۆ چارەسەری كێشەكە دەردەبڕێت و دەشڵێت "دەكرێت ئەمساڵ چارەسەر ببێت".
محەمەد شیاع سوودانی، سەرۆكوەزیرانی عێراق، لە گفتوگۆیەكدا لەگەڵ بلۆمبێرگ باس لە لەمپەرەكانی بەردەم هەناردەكردنەوەی نەوتی هەرێم دەكات كە نزیكەی ساڵ و نیوێكە بەهۆی بڕیارەكەی دادگای ناوبژیوانیی نێودەوڵەتی ڕاگیراوە.
سوودانی دەڵێت "بڕیارەكانی دادگای فیدڕاڵی سەبارەت گرێبەستەكانی نەوت لە هەرێمی كوردستان و یاسای بودجە كە تێیدا تێچووی بەرهەمهێنانی بەرمیلێك نەوت بە 8 دۆلار جێگیر كراوە و نابێت لەوە زیاتر تێپەڕێت"، هۆكاری دەستپێنەكردنەوەی هەناردەی نەوتی هەرێمن.
هەروەها ئاماژە بەوە دەكات كە "ئەوە لە كاتێكدایە تێچووی بەرهەمهێنانی نەوت لە گرێبەستە نەوتییەكانی ئەو كۆمپانیایانە لەگەڵ حكومەتی هەرێمی كوردستان، بە 26 دۆلار جێگیر كراوە".
سەرۆكوەزیرانی عێراق سەبارەت بە ڕێگەچارەی كێشەی نەوت ڕایدەگەیەنێت "ئێستا ئێمە لەنێوان دوو بژاردەداین و بژاردەی سێیەم بوونی نییە: یان دەبێت ئەو گرێبەستانە هەموار بكەینەوە، كە ئەمە لەلایەن ئەو كۆمپانیانەی لە هەرێمی كوردستان كار دەكەن، ڕەت كراوەتەوە. یاخود دەڕۆین بەرەو هەمواركردنەوەی یاسای بودجە، كە ئەوەش پێویستی بە ڕێككەوتنی سیاسی هەیە".
محەمەد شیاع سوودانی جەخت دەكاتەوە كە "عێراق بە پەرۆشە بۆ چارەسەكردنی ئەم كێشەیە و وەبەرهێنان لەو نەوتە و كاركردن لەگەڵ كۆمپانیاكان". دەشڵێت "بۆ ئەو مەبەستە دانوستانی بەردەوام لە ئارادایە لەگەڵ كۆمپانیاكان و براكانمان لە هەرێمی كوردستان".
"ئێمە توانای بەرهەمهێنان لەدەست دەدەین لەم هێڵە ستراتیژی و گرنگە، بۆیە هیوادارین بگەین بە ڕێگەچارەیەك سەبارەت بە ڕێكارە یاساییەكان. دەكرێت ئەمساڵیش كێشەكە چارەسەر ببێت"، محەمەد شیاع سوودانی، سەرۆكوەزیرانی عێراق وا دەڵێت.