پەرەگراف
بارزانی بۆ چارەسەری كێشەكانی نێوان هەرێم و بەغدا جەخت لە "پابەندی بە دەستوور و ڕێككەوتنەكان، دیالۆگ و نیازپاكی" دەكاتەوە. دەشڵێت "ناكرێ خەبات و قوربانیدانی كوردستان لە مووچەدا بچووك بكرێتەوە، یان هەوڵی لێكترازاندنی هەرێمی كوردستان بدرێت".
پاش دوو ڕۆژ دانوستان لەگەڵ ئەنجوومەنی ئابووریی هەرێمی كوردستان، شاندەكەی ئەنجوومەنی وزاریی ئابووریی عێراق سەردانی مەسعود بارزانیی سەرۆكی پارتیی كرد.
بەپێی ڕاگەیەندراوی بارەگای بارزانی، شاندی میوان جەختیان لەوە كردەوە كە "چاوپێكەوتن و كۆبوونەوەكانیان لەگەڵ حكوومەتی هەرێم سوودبەخش بووە و مەبەستیانە هەموو لایەك لە كەشێكی پڕ لە متمانە و بە تێڕوانینێكی شەفاف و بنیاتنەر، بگەنە لێكتێگەیشتنێكی تەواو لەپێناو چارەسەركردنی كێشەكان و لابردنی كۆسپەكان".
مەسعود بارزانی لە كۆبوونەوەكەدا بە شاندەكەی عێراقی وتووە "ناكرێ لەبری ڕێزگرتن لە داواكانی گەلی كوردستان و قەرەبووی ئەنفال و كیمیاباران، هەوڵی ئەوە بدرێت دۆزێكی مێژوویی و خەبات و قوربانیدانی بێهەژماری كوردستان، لە بابەتی مووچەدا بچووك بكرێتەوە، یانیش هەوڵی لێكترازاندنی هەرێمی كوردستان بدرێت".
بارزانی جەختیشی لەوە كردووەتەوە كە "باشترین ڕێگە بۆ نەهێشتنی كێشەكان، گرتنەبەری شێوازی لێكتێگەیشتن و دیالۆگی نێوان حكوومەتی عێراقی فیدڕاڵ و حكوومەتی هەرێمی كوردستانە".
"بۆ چارەسەركردنی كێشەكان، پێویستە هەموومان بۆ دەستوور بگەڕێینەوە و لەگەڵ ئەوەشدا پابەندی ئەو ڕێككەوتنە سیاسییە بین كە لایەنەكانی هاوپەیمانێتیی ئیدارەی دەوڵەت لەسەری ڕێك كەوتوون"، سەرۆكی پارتی وای وتووە.
مەسعود بارزانی "پێزانینی بۆ ڕۆڵ و هەوڵەكان"ـی محەمەد شیاع سوودانی، سەرۆكوەزیرانی عێراق دەربڕیوە لەپێناو "نەهێشتنی كۆسپەكان و چارەسەركردنی گرفتەكان"، ئەوەشی دووپات كردووەتەوە كە "لەپاڵ پابەندبوون بە دەستوور و ڕێككەوتنە سیاسییەكان، پێویستە نیازپاكی و ئیرادەیەكی ڕاستەقینە بۆ چارەسەری كێشەكان هەبێت".