هەرێم و بەغدا لەسەر چەند خاڵێك ڕێككەوتن؛ بەزوویی لیستی مووچەی مانگی هەشت دەنێردرێت
پەرەگراف
بۆ دووەم ڕۆژ كۆبوونەوەكانی نێوان شاندەكەی حكومەتی فیدراڵ و حكومەتی هەرێم لە هەولێر بەردەوامە. لەبارەی ژمارەیەك بابەتەوە هەردوولا گەیشتوونەتە "ڕێككەوتن" و وەزارەتی دارایی هەرێمیش لیستی مووچەی مانگی هەشت ڕادەستی وەزارەتی دارایی عێراق دەكات.
پاش كۆبوونەوە فراوانەكەی هەردوو ئەنجوومەنی وزاریی ئابووریی عێراق و ئەنجوومەنی ئابووریی هەرێمی كوردستان، هەر لە دوێنێوە كۆبوونەوەی چڕ و پڕ بە تایبەتیش لە نێوان وەزارەتی دارایی هەردوولا دەستی پێ كردووە و بەردەوامە.
بەپێی میدیای نزیك لە سەرۆكی حكومەتی هەرێم، ڕێككەوتن لەبارەی ژمارەیەك بابەتەوە كراوە پەیوەست بە مووچە، وەبەرهێنان، باج و گومرگ.
سەبارەت بە مووچە، وەزارەتی دارایی هەرێمی كوردستان لیستی مووچەی مانگی هەشتی ئامادە كردووە و "ئەمڕۆ یان سبەی" ڕادەستی وەزارەتی دارایی عێراقی دەكات. میدیای نزیك لە سەرۆكی حكومەتی هەرێم دەشڵێت "ڕێككەوتن لەبارەی مووچەوە كراوە"، بەڵام هیچ زانیارییەكی لەوباریەوە نەخستووەتە ڕوو.
هەروەها هەردوولا ڕێككەوتوون كە "كۆمپانیاكان تەنیا باج بە یەك حكومەت بدەن، یان حكومەتی عێراق یان هەرێمی كوردستان، واتا نابێت باجی دوولایەنە بمێنێت".
هەرێم و بەغدا لەسەر پێكهێنانی لیژنەیەكی هاوبەش ڕێككەوتوون بۆ "لادانی بازگەكانی گومرگ لە نێوان شارەكانی هەرێمی كوردستان و عێراق"، كە ئەو بابەتە یەكێكە لە كێشە سەرەكییەكانی بازرگانان.
بۆ چارەسەركردنی كێشەكانی وەبەرهێنانیش لە نێوان هەردوولا، ڕێككەوتوون كە "هەفتەی داهاتوو شاندێكی دەستەی وەبەرهێنانی هەرێمی كوردستان سەردانی بەغدا بكات" و گفتوگۆی ورد لەوبارەیەوە بكرێت.
بەهۆی زۆریی دۆسیەكان و وردەكاریی كێشەكان، گفتوگۆی ورد لەبارەی بابەتەكانی مووچە، نەوت، داهاتی دەروازە سنوورییەكان و باج و ڕسومات بەردەوامە و ئەگەریشی هەیە كۆبوونەوەكان بۆ سبەینێ درێژ بكرێنەوە، یاخود بە لیژنەی تایبەتمەندی هاوبەش بسپێردرێن.