پەرەگراف
وەزارەتی دارایی عێراق گفتوگۆكانی ئەمڕۆی هەولێر بە "هەلێكی مێژوویی بۆ بەدیهێنانی بەرژەوەندی هاوبەش" ناو دەبات، هاوكات جەخت لەسەر "دابەشكردنی دادپەروەرانەی داهاتی نەوت و دەروازە سنوورییەكان" دەكاتەوە. وەزارەتی دارایی هەرێمیش دەڵێت "كۆبونەوەكە لە كەشێكی ئەرێنیدا بەڕێوە چووە و چاوەڕوان دەكرێت دەرئەنجامەكانی لە بەرژەوەندیی مووچەخۆرانی هەرێم بێت".
هەردوو وەزارەتی دارایی هەرێم و عێراق ڕاگەیەندراویان لەسەر كۆبوونەوەكەی ئەمڕۆ ئەنجوومەنی وزاریی ئابووریی عێراق و ئەنجوومەنی ئابووریی هەرێم بڵاو كردەوە، كە تێیدا گفتوگۆی چڕ و پڕ دەربارەی "مووچە، بودجە، دەروازە سنوورییەكان، هەماهەنگیی گومرگی و باج" كراوە.
وەزارەتی دارایی عێراق دەڵێت "گفتوگۆكان لە چوارچێوەی هەوڵەكانی حكومەتی عێراقە بۆ پتەوكردنی هاوكاریی نێوان حكومەتی فیدڕاڵی و هەرێمی كوردستان". بەپێی ڕاگەیەندراوی وەزارەتی دارایی هەرێمی كوردستانیش، "هەردوو لا هاوڕا بوون كە میكانیزمی هاوبەش بۆ چارەسەری كێشەكان بدۆزرێنەوە".
وەزارەتی دارایی عێراق ئاماژەی بەوە كردووە، لە گفتوگۆكاندا كە سبەینێش بەردەوام دەبن، تیشك دەخرێتە سەر "ئامرازەكانی پتەوكردنی هاوكاریی دارایی نێوان هەردوولا و گەیشتن بە چارەسەرێكی بەردەوام بۆ پرسە داراییە هەڵپەسێردراوەكان".
"وەزیری دارایی جەختی لەوە كردووەتەوە، ئەمجۆرە گفتوگۆیانە هەلێكی مێژووییە بۆ بەدیهێنانی بەرژەوەندیی هاوبەشی نێوان هەردوو حكومەتی فیدڕاڵی و هەرێمی كوردستان، هەروەها جەختی لە بەهێزكردنی پەیوەندیی هاوكاریی نێوان هەردوولا و گەیشتن بە چارەسەریەكی بەردەوام بۆ پرسە داراییە هەڵپەسێردراوەكان كردووەتەوە"، وەزارەتی دارایی عێراق وا دەڵێـت.
تەیف سامی، وەزیری دارایی عێراق، جەختی لەوە كردووەتەوە كە "ڕێككەوتن لەسەر میكانیزمێكی دادپەروەرانە بۆ دابەشكردنی داهاتی نەوت و دەروازە سنوورییەكان، یارمەتیدەر دەبێت بۆ بەرزكردنەوەی متمانە و سەقامگیریی ئابووری لە وڵاتدا".
وەزارەتی دارایی هەرێمی كوردستان لە ڕاگەیەندراوێكدا لەبارەی كۆبوونەوەكەوە دەڵێت "كۆبوونەوەكە لە كەشێكی ئەرێنی و بەرپرسیارانەدا بەڕێوە چوو، هەردوو لا هاوڕا بوون لەسەر چارەسەری كێشە هەڵپەسێردراوەكان بەتایبەت ئەو كێشانەی ڕەهەندی دارایی و و ئابوورییان هەیە، لەسەر بنەمای یاسا و دەستوور".
وەزارەتی دارایی هەرێم لەگەڵ ئاماژەدان بەوەی كە بڕیارە كۆبوونەوەكان سبەی دووشەممەیش درێژەی هەبێت، دەشڵێت "چاوەڕوان دەكرێت دەرئەنجامەكانی لە بەرژەوەندیی فەرمانبەران و مووچەخۆران و خانەنشیان بە گشتی و هەرێمی كوردستان بێت".