مەسروور بارزانی: هەرێمی كوردستان قەوارەیەكی فیدراڵییە و دەبێت لەم چوارچێوەیەدا ڕەفتاری لەگەڵ بكرێت
پەرەگراف
لە كۆبوونەوەی نێوان هەردوو ئەنجوومەنی وزاریی ئابووریی هەرێم و عێراق، مەسروور بارزانی ڕایگەیاندووە "پێویستە حكومەتی فیدراڵ بە شێوەیەكی دادپەروەرانە مامەڵە لەگەڵ هەموو بەشەكانی عێراق بكات و حكومەتی هەموو ناوچە و پارێزگاكان بێت، وەك چۆن داكۆكی لە مافی هاووڵاتییانی بەسرا و بەغدا دەكات، بە هەمان شێوە پێویستە بەرگری لە مافەكانی خەڵكی هەرێمی كوردستانیش بكات".
پاش شەش كاتژمێر لە دەستپێكردنی، كۆبوونەوەكانی یەكەم ڕۆژی ئەنجوومەنی وزاریی ئابووریی عێراق و ئەنجوومەنی ئابووریی هەرێمی كوردستان لە هەولێر كۆتایی هات، سبەینێش كۆبوونەوەكان بەردەوام دەبن.
كۆبوونەوەكان بۆ گفتوگۆ لەبارەی چارەسەكردنی كێشە هەڵپەسێردراوەكانی نێوان هەرێم و بەغدایە و ئەنجوومەنی وەزیرانی هەرێم دەڵێت "جەخت لە ڕێزگرتن لە مافە دەستوورییەكانی هەرێمی كوردستان كرایەوە".
بەپێی ڕاگەیەندراوی ئەنجوومەنی وەزیرانی هەرێم، مەسروور بارزانی، سەرۆكی حكومەتی هەرێم، لە دەستپێكی كۆبوونەوەكەدا وتوویەتی "ئەگەر خواست و ویستی چارەسەر هەبێت، چارەكردنی كێشەكان ئاسانە و پێویستە ڕێزگرتن لە دەستوور و ڕێككەوتنەكان بنەما بێت بۆ چارەسەركردنی هەموو كێشە و ناكۆكییەكان".
هەروەها جەختی لەوە كردووەتەوە كە "هەرێمی كوردستان، هەرێمێكی دەستووریییە و دەبێ ڕێز لە قەوارەی فیدراڵیی هەرێم بگیرێت و لەم چوارچێوەیەدا ڕەفتار لەگەڵ هەرێمی كوردستان بكرێت".
ئەنجوومەنی وەزیرانی هەرێم دەڵێت "د. فوئاد حسێن، جێگری سەرۆكوەزیرانی فیدراڵ و سەرۆكی ئەنجوومەنی وەزاریی عێراق بۆ ئابووری، هاوڕابوو لەسەر گرنگی و پێویستیی چارەكردنی كێشە هەڵپەسێردراوەكان لەسەر بنەمای دەستوور. وتیشی: هاتنی ئەم شاندە باڵایە بە مەبەستی چارەسەركردنی كێشەكانە".
لە كۆبووەنەوەكەی ئەمڕۆدا، لیژنە پەیوەندیدارەكانی هەردوولا بە جیا لەسەر تەوەرەكان كۆبوونەتەوە و گفتوگۆی بەرفراوانیان كردووە.
"كۆبوونەوەكانیش لە كەشێكی ئەرینێیدا بەڕێوە چوون، كە تێیدا بە شێوەیەكی ڕاشكاوانە بیروڕا لەبارەی چارەسەكردنی كێشەكان لەسەر بنەمای دەستوور ئاڵوگۆڕ كرا و بڕیارە كۆبووەنەوەكانیش بۆ ماوەی دوو ڕۆژ بەردەوام بن"، ئەنجوومەنی وەزیرانی هەرێم وا دەڵێت.