پەرەگراف
كۆبوونەوەی هەردوو ئەنجوومەنی وەزاریی ئابووری عێراق و ئەنجوومەنی ئابووریی هەرێمی كوردستان لە شاری هەولێر دەستی پێ كرد. مافە دەستوورییەكان، شایستە داراییەكان و كێشە هەڵپەسێردراوەكان تەوەری سەرەكیی كۆبوونەوەكە دەبن.
شاندی باڵای ئەنجوومەنی وەزاریی ئابووریی عێراق پێكهاتووە لە فوئاد حسێن، سەرۆكی ئەنجوومەنەكە و جێگری سەرۆكوەزیرانی عێراق، محەمەد تەمیم، جێگری سەرۆكوەزیران و وەزیری پلاندانانی عێراق، تەیف سامی، وەزیری دارایی عێراق، عەلی عەللاق، پارێزگاری بانكی ناوەندیی عێراق و چەندین بەرپرسی باڵای دیكە.
لە هەرێمی كوردستانیش، مەسروور بارزانی و قوباد تاڵەبانی، سەرۆك و جێگری سەرۆكی حكومەتی هەرێم، ئاوات شێخ جەناب، وەیری دارایی و ڕێبەر ئەحمەد، وەزیری ناوخۆ و چەندین وەزیر و بەرپرسی باڵای دیكەی حكومەتی هەرێم لە كۆبوونەوەكەدا بەشدارن.
بەپێی ڕاگەیەندراوی وەزارتی دارایی عێراق، لە كۆبوونەوەكەدا "بابەت و پرسە ئابووری و داراییەكان بە تایبەت مافە دەستوورییەكانی هەرێم، شایستە داراییەكانی هەرێم، سەرجەم كێشە هەڵپەسێردراوە پەیوەندیدارەكانی نێوان حكومەتی فیدراڵی و حكومەتی هەرێمی كوردستان گفتوگۆیان لەبارەوە دەكرێت".
وەزارەتی دارایی عێراق دەشڵێت "ئامانجی سەردانی شاندەكەی عێراق و كۆبوونەوەكە، بەهێزكردنی هاوكارییە ئابووری و داراییەكانی نێوان هەردوولا، چارەسەركردنی كێشەكان، پەرەپێدانی پەیوەندییەكان بە جۆرێك كە لە خزمەتی گەلی عێراقدا بێت".