پەرەگراف
تەنیا ئەمڕۆ سێ كەس لە ناوچە جیاوازەكانی هەرێمی كوردستان خنكاون. مێرمنداڵێك لە ڕووباری كاولۆكان و نەجەوانێك لە ڕووباری خابوور و گەنجێك لە زێی گەورەدا. بەرگریی شارستانی جارێكی دیكە داوا لە هاووڵاتیان دەكات كە "پابەندی ڕینماییەكان بن و خۆیان بەدوور بگرن لەو شوێنانەی مەترسیی خنكانی لێ دەكرێت".
ڕووداوی یەكەم، كاتژمێر 1:30 خولەكی نیوەڕۆی ئەمڕۆ لە زێی گەورە و لە نزیك گوندی وسومەلیان ڕووی داوە. تێیدا كەسێك بەناوی (ئەمیر نەجمەدین)ـی تەمەن 26 ساڵ و دانیشتووی هەولێر، خنكاوە.
بەرگریی شارستانیی هەولێر دەڵێت، ئەو كەسە لە كاتی مەلەكردندا خنكاوە دوای كەمتر لە سێ كاتژمێر لەلایەن تیمی ژێرئاوی خەباتەوە تەرمەكەی دۆزراوەتەوە. بەرگریی شارستانیی هەرێمی كوردستان دەڵێت "ئەو گەنجە خەڵكی ڕۆژهەڵاتی كوردستانە".
حاڵەتی دووەمی خنكان لە كاتژمێر 3:30 خولەكی ئێوارەی ئەمڕۆ لە ڕووباری خابووردا ڕووی داوە. بەرگریی شارستانیی زاخۆ دەڵێت "نەوجەوانێكی تەمەن 17 ساڵی دانیشتووی زاخۆ لە (گوندێ پیرەكا) خنكاوە و تەرمەكەی لەلایەن تیمەكانی ژێرئاوی بەرگریی شارستانیی زاخۆوە دەرهێنرا".
حاڵەتی سێیەمی خنكان كاتژمێر 5:30 خولەكی ئێوارەی ئەمڕۆ لە سنووری قەزای ڕواندز لە ڕووباری كاولۆكان ڕووی داوە.
بەرگریی شارستانیی سۆران دەڵێت "مێرمنداڵێكی تەمەن 15 ساڵ بە ناوی (ڕاوێژ ڕەسووڵ حەمەدئەمین) خەڵكی گوندی دەرگەڵە و دانیشتووی ناحیەی دیانا، لە كاتی مەلەكردندا خنكاوە".
بەرگریی شارستانیی سۆران دەڵێت "ئەمە 14یەمین حاڵەتی خنكانە لەمساڵدا لە سنووری ئیدارەی سەربەخۆی سۆران".